Jesus Irizar 'Txutxin' hil da

Eneko Azurmendi Barrena 2024ko mai. 1a, 14:55

Oñatz Dantza Taldearen erreferente nagusienetako bat hil da: Jesus Irizar Etxezarreta Txutxin (Oñati, 1949). Dantzari aritu zen gaztetan, eta irakasle lanetan gero, urte luzez. Azken urteetan lan horietatik apur bat aldenduta bazegoen ere, dantza taldeari estuki lotuta jarraitzen zuen. Halaber, Corpusetako Kofradiako kide ere bazen. 74 urterekin hil da maiatzaren 1ean.

Ibilbide oparoa izan du Txutxin-ek, eta 2021ean, Oñatz Dantza Taldearen 50. urteurren ospakizunean aitortza "hunkigarria" jaso zuen.

Nekaezina

Oñatz dantza taldeko kideen artean bereziki sumatu da samina, taldeko erreferente nagusienetakoa izan baita Txutxin. Osaba eta aita ere dantzariak zituen eta gertutik eta pasioz bizi izan du dantza hark beti, ez dantzari moduan bakarrik, baita dantza moldeak ikertzen, lantzen eta hark jaso eta bizitakoa ondorengoei transmititzeko lanean ere. "Haren adoreari esker iraun du Oñatz dantza taldeak; Euskal Herrian ez dago horrelako beste talderik. Pasioz bizi zuen dantza, sinistu egiten zuen, eta detaile guztiak zaintzen zituen. Indar handia zuen eta guztion errespetua lortu zuen", dio Txutxin-ekin batera 1970eko lehen Haurren Eguna antolatzeko taldean ibili zen Lourdes Idoiagak.

Lander Diaz de Gereñu txistulariak ere bat egiten du haren izaerak herriko dantza taldean izan duen garrantziarekin. "Nekaezina izan da. Harreman estua izan dugu, eta eztabaida asko, zorionez. Transmisioan lan handia egin du eta jakin izan du garai berrietara ere egokitzen". Kultura batzordeburu Iñaki Olaldek ere gogoan ditu harekin egindako bilerak: "Makina bat egin dugu. Zehatza zen, serioa lanean, zorrotza. Dantzaren bueltan, erraldoi txikien proiektua, Inauteriak, Corpusak... askotan elkartu ginen. Hari esker Oñatiri buruz asko ikasi dutela aitortzen dute kulturako langile hainbatek, esaterako".

Euskal Herrian erreferente

Euskal Herri mailan izan da erreferente Txutxin, eta "dantza-maisuaren" ibilbidea jaso du Dantzan elkarteak. Euskal Herri osoko hainbat dantza taldetako kideek eta txistulariek izan dute oñatiarra gogoan.

Sare sozialen bidez ere heriotzak eragindako tristura erakutsi dute oñatiarrek.

Herrikoa eta herriarentzat , etxekoa eta etxekoentzat. Plazerra zure iloba izan izana tio Txutxin, lurrak goxo har zaitzala ❤️❤️❤️ https://t.co/0uuz9VyVPw
— Markel Irizar (@Markelirizar) May 1, 2024

Egun tristea, gaurkoa, Oñatiarrontzat eta @oinatzdantza taldearentzat bereziki. Bizitza osoa geure dantzei emana, herriaren eta herritarren goguan egongo zara betiko Txutxin.

Lurrak goxo har zaitzala. pic.twitter.com/1m0nozvtgm
— Izaro Elorza Arregi (@ElorzaIzaro) May 1, 2024