Egungo txirrindularitzan pronostikoak egitea geroago eta zailagoa da, belaunaldi gazteak edozertarako gai direla erakusten dabiltza eta. Goienan txirrindularitzaz idazten duen Andoni Urbistondok, baina, apirilaren 1ean hasiko duten Itzulira begira Debagoienean jokatuko dituzten kilometroetan jarri du arreta. "Adi laugarren etaparekin, zuenean lehiatuko dituzten kilometroetan egon daiteke-eta Itzuliko gakoa", dio kolaboratzaile urnietarrak. "Vingegaardek eta Pogacarrek lehia izugarria dute: batek O Camiñon erakustaldia egiten badu, besteak Kataluniako Volta aise irabazten du. Hala, Itzulira Vingegaard beste horrenbeste egitera etorriko da, lasterketa ahalik eta azkarren erabakita uztera".
Ibarrekoak amaiera gogorra
Hori horrela, Urbixen ustez, Etxarri Aranatzen hasi eta Legution amaituko duten laugarren etapak zeresan handia izan dezake lasterketan. "Untzillako maldak Krabelingoak [azken etapa] besteko erabakigarriak izan daitezke, ez gutxiago. Izan kontu Debagoienetik pasako den etapan ziklistek oso tarte laburrean malda gogorrak izango dituztela. Oletako [16:20] maldak lehenengo, ondoren Kruzeta jaitsi eta segituan izango dute Untzilla [16:40]... Bi kilometroko igoera da, baina pendiz handikoak, eta Visma-Lease moduko talde batek nahi badu tropela lehertu dezake han, eta ez ahaztu oraindik Leintz Gatzagako [17:05] maldak geratzen direla. Etapa amaiera hori oso aproposa da Vingegaard moduko ziklista batendako, eta handik Legutiora dauden kilometroetan hegan egin dezake. Ondo badago, sailkapen orokorrera begira alde polita lor dezake; horregatik diot adi ibiltzeko etapa horrekin".
Seigarrena, Bergaratik
Esan moduan, laugarren etapak 40 kilometro egingo ditu Debagoienean, eta seigarren etapa –apirilak 6– ostera bueltatuko da ibarrera. Ohi moduan, azken etapa menditsua izango da –Eibar-Eibar–, tranpaz beteta dagoena. Ziklistek Azurki, Gorla –Elosutik–, Krabelin, Trabakua, Izua eta Urkaregi igoko dituzte. Gorlako gainetik 15:10 inguruan pasako dira, eta 8 minutu geroago zeharkatuko dituzte Bergarako kaleak; Mekolaldetik Soraluzeko bidea hartuko dute gero.
