1000 biztanle baino gutxiago dituzten Gipuzkoako 32 herriri dago zuzenduta ekimen hau, eta Leintz Gatzaga da ekimen honetan sartuko den Debagoieneko herri bakarra.

Helburua da, landa inguruneko herri txikien garapenean laguntzea, izan ere, askotan zailtasunak izaten dituzte bertako biztanleen bizi kalitatea hobetzeko proiektuak aurrera eramateko.

40 milioi euro bideratuko ditu Aldundiak 2011 bitartean ekimen honetara, eta lau proiektu mota garatzeko izango dira: ura, bideak, erabilera anitzeko azpiegiturak eta etxebizitza.

Hiru proiektu posible

Oraindik ezer finkorik ez badago ere, Udalean hasi dira pentsatzen ze proiekturako eskatu laguntza. Pilotalekua estaltzea eta baserrietarako bideen sarrerak hobetzea dira aukeretako batzuk, baita urarekin Arlaban inguruan dituzten arazoak konpontzea ere.

Ezer zehaztu aurretik baina, Udalak jakin gura du nola banatuko duen dirua Aldundiak, eta Leintz Gatzagarako zenbat diru geratuko den.