Leintz Gatzaga
Transformagailu berria jarri beharko dute aurten herrian
Dokumentu Akzioak
Herriko eskolaren azpiko aldean dagoen transformagailu zaharra kendu eta berria jarriko dute datozen hilabeteotan. Hala jakinarazi digu Eusebio Villar alkateak: "Derrigortuta gaude, nahikoa potentzia ez daukalako. Oraindik herriko etxeetan ez dute arazorik izan, baina ezer igartzen hasi aurretik aldatu behar dugu".
Izan ere, Gatzagako Udalak argindarra erosten dio Iberdrolari Leintzargi enpresaren bitartez, eta ondoren herritarrei banatzen die. Ez da batere ohikoa, eta Gipuzkoan beste bi herritan bakarrik egiten dute, Oñatin eta Tolosan. Argindarraren banatzailea delako hain zuzen egiten diete jarraipen zorrotza Madrilgo Industria Sailetik, eta transformagailu berria jartzera derrigortu dituzte. Alkateak onartu du dirutza handia dela Udalarendako: "Mailegua eskatu beharko dugu, kontu honetarako ez dago-eta dirulaguntzarik".
Ez dute datarik zehaztu aldaketa egiteko, baina alkateak uste du iraila bukatzerako berria jarrita egongo dela.
