Negu giroa iritsi da astean. Euria, elur ura eta txingorra egin du, batez ere martitzen eta eguaztenean; gainera, haize bolada zakarrak ibili dira. Gatzagako tontorrik garaienak zuritu ditu bi egun horietan, Olaun aldean zein Goierrin, baina herrian ez da elurrik geratu.

Udal batzuek elurrari aurre egiteko gomendioak egin dituzte, eta gatza gertatu dute elurra eta izotza kentzeko. Gatzagako Udalak, ostera, ez zuen beharrezkoa ikusi halako neurririk: "Ez dut uste hainbesterako izango denik. Aurtengo negua elur barik pasatu beharko dugulakoan nago", esan zigun Eusebio Villar alkateak martitzenean.

Ikusi egin beharko da herriak zurituko diren edo ez; hala gertatuz gero, traktorea dauka Udalak gertu, eta pala jartzen dio bideak garbitzeko. Herriko kaleak eta inguruak eta baserrietara doazen bideak garbitzen dituzte udal langileek. Gainerako errepideak garbitzeaz Aldundia arduratzen da. Lanean hasteko gertu egon dira egunotan elurra kentzeko hiru makina Arlabanen.