2012-02-09 16:10:57 Mirian Biteri
Dagoeneko salgai daude Aratusteetako bazkarirako txartelak. Inkernu, Goxotxiki eta Aldatz tabernetan erosi ahal izango dira martitzena, hilak 14, baino lehen. Helduenak 15 euro balio du, eta 14 urtetik beherakoenak, ostera, 10 euro.
2012-02-09 08:19:39 Eneko Azkarate
Trafiko Sailarekin hitz eginda, eta kontuan hartuta zein den errepideen egoera (ez dago arazorik), gaur, otsailak 9, eguena, goizez eskolak emango dira, normal, Huhezin, Mondragon Unibertsitatearen Humanitate eta Hezkuntza Zientzien Fakultatean, Eskoriatzan. Goizeko 11:00etan jakinaraziko da fakultatearen webgunean zer gertatuko den arratsaldeko eskolekin. MUko gainerako fakultateetan ere normal ariko dira gaur.
2012-02-08 16:34:44 Mirian Biteri
Euskal zerbitzu publikoko langileek biharko deitu duten lau orduko lanuzteak eragina izango du Eskoriatzan. Luis Ezeiza ikastetxean lanuztea egingo dute. Hango langileek baieztatu digute 09:00etatik 11:00etara eskolak izango direla, eta gero, irakasle eta sukaldari guztiek lanuztea egingo dutela. Osasun etxean, berriz, zerbitzu minimoak izango dituzte goizean. Bestalde, udaletxean jakinarazi digute botaziorik ez dutela egin, eta hortaz, udal langile bakoitzak nahi duena egingo duela.
2012-02-08 12:11:36 Eneko Azkarate
Errepideen egoera aztertu eta gero eta Gasteiztik heltzeko dauden arazoak kontutan hartuta, Mondragon Unibertsitateko Eskoriatzako Campusean, Huhezin, ez da eskolarik emango gaur, otsailak 8, arratsaldean.
Beste campus guztiek normaltasunez funtzionatzen dute.
2012-02-08 12:05:03 Eneko Azkarate
Opel Corsa batek eta Citroen Jumper furgoneta batek elkarren kontra jo dute gaur, 10:50etan, Aretxabaleta eta Eskoriatza arteko mugan, Almeneko bidegurutzearen inguruan. Istripuaren ondorioz, bi lagun zauritu dira, autoan zihoazenak, eta Debagoieneko Eskualde Ospitalera, Arrasatera, eroan dituzte. Suhiltzaileek atera behar izan dituzte autotik. Herrizaingo sailak aditzera eman duenez, errail bat itxi dute eta trafikoa bideratzen dihardute ertzainek. Bestalde, aditzera eman dute bi zaurituak ez dituztela larri eroan ospitalera.
2012-02-08 11:26:48 Eneko Azkarate
Errepideen egoera aztertu eta gero, Mondragon Unibertsitateak erabaki du Huhezin klaseak ez ematea gaur arratsaldean. Baina, osterantzean, gainerako beste fakultate guztietan, klaseak normaltasunez emango dituzte. Egunean zehar beste erabakirik hartu behar bada, emango dute horren berri.
2012-02-08 08:50:06 Eneko Azkarate
Elur ekaitza dela-eta, gaur, otsailak 8, eguaztena, goizez, eskola emango da Huhezin, Mondragon Unibertsitatearen Humanitate eta Hezkuntza Zientzien Fakultatean, Eskoriatzan. Egunean barrena eguraldiak txarrera egingo balu, goizeko 11:00etan jakinaraziko dute honetan bertan zer gertatuko den arratsaldeko eskolekin.
2012-02-06 11:58:15 Maider Arregi
Santa Ageda eguna eta bezpera ibarreko herri guztiek ospatu dute. Jarrian, aste bukaeran Bergaran, Arrasaten, Eskoiratzan eta Aretxabaletan ikusi eta entzundakoak bideoetan:
2012-02-06 11:24:58 Larraitz Zeberio
Luis Ezeiza ikastetxeak gonbidatuta egin zuen Eskoriatzan haurren liskarren arteko hitzaldia Andoni Colas psikologoak. Gomendio interesgarriak eman zituen.
2012-02-06 08:17:21 Julen Iriondo
"Oso pozik"; halaxe zegoen Itoitz Armendariz musher eskoriatzarra Pirena amaitu berritan. Bi asteko lasterketa bikainaren ostean seigarren amaitu du Armendarizek azken sailkapenean; Plateau de Beillen jokatutako egubakoitzeko azken etapari bosgarren sailkatua harrapatzeko ilusioarekin ekin eta lortu ez arren, emaitza handia da Eskoriatzakoak lortutakoa, aurrez espero baino askoz hobea.
goiena.net © Goiena Komunikazio Taldea
Otalora Lizentziaduna 31 · 20500 Arrasate (Gipuzkoa)
Tel.: 943 25 05 05 · webmaster@goiena.com
