Uztailaren 13ko osoko bilkuran onartu zuen udalbatzak oinezkoen kaleetarako arautegia, eta aurreratu zuten abuztua aproposa ikusten zutela arautegi horrek ekarriko dituen piboten funtzionamendua egokia den ikusteko. Bi asteotan bilerak egin dituzte atariz atari Salbador eta Lasao kaleko bizilagunek. "Dagoeneko 200 mando banatu ditugu", adierazi dute udaletxetik. Gaur bukatuko dute batzar horiekin eta jakinarazi dute bihar ipiniko dela martxan Salbador kaleko pibota. "Mandoa behar dutenek udaletxean eskatu behar dute, abuztuan ere izango dute horretarako aukera", gaineratu dute.

Arautegia etxez-etxe

Herritarrek atzo jaso zuten arautegia etxe postontzian. Honela dio lehenengo parrafoak: "Elgetako udalak lau kale oinezkoentzat jarri ditu. Hemendik aurrera kale horrietan zirkulazio arau berriak erabiliko dira. Aldaketa horrekin gura nahi duguna da herri barruan zirkulazioa murriztea, oinezkoen lasaitasuna eta bizi kalitatea hobetzea, eta zarata murriztea". Liburuxka horretan arau guztiak irakur daitezke.