Itsasertzeko zubia

Aurreko egun batean, ikasten dudan Leioako kanpusetik autobusez jaisten nengoela, neska gazte bat etorri zitzaidan autobus zerbitzuari buruzko inkesta egitera. Bertan, zein ibilbide egiten nuen, zenbatero hartzen nuen autobusa... eta antzerako galderak egin zizkidan, zerbitzua hobetze aldera antza.

Ez nintzen gustura geratu, nire kexa iturri nagusienaren gainean (nirea, eta Leioako kanpusean ikasten dugun ikasle gehienena, nire ustez: bidaitxartelaren prezioaren gainean) ez zidatelako ezer ere ez galdetu. Hori dela eta, hemen plazaratuko dut nire egoera:

Ni, getxoztarra izanik, Leioa kokaturik dagoen zonalde berean (2. zonaldea) hartzen dut autobusa, eta beraz bizkaibuseko bidaiko preziorik merkeena dut (zenbat eta zonalde gehiago gurutzatu orduan eta garestiagoa baita): Creditransa erabiliz, 0,85€ bidaiako (ikus pdf honetan).

Urtean zehar, astean bost egunez egiten dut joan etorria, beraz, nire asteroko gastua autobusean 0,85 x 2 x 5 = 8,5€-koa izango da. Autobusa urritik ekainera lan egun guztietan erabiltzen badut, 9 hilabetean zehar egongo naiz autobusa erabiltzen.

Goazen kentzen hilabete bat, Gabonak, Aste Santua, jaiak eta egin nitzakeen sasieskolak kontatzeko, 8 hilabete oso geratuko litzaizkidake, bakoitza lau asterekin. Guztira, 8,5 x 4 x 8= 272 €-tako gastua ikasturte bakoitzean, autobusean bakarrik.

Konparatzeko, Metrobilbaoko zonalde bakarreko gazte-abonuarekin konparatuko dugu: 184€-takoa da (ikus hemen) zonalde bakarreko gazte txartelaren prezioa, hots, nik ikasturtero Bizkaibusean gastatzen dudana baino 88€ merkeago. Gogora dezagun, gainera, metroko txartelarekin nahi beste bidaia egin daitezkeela eta beraz, gure kalkulurako erabili ditugun baino desplazamendu gehiago egin daitezkeela prezio berarekin -erosketetan bilbora, parrandan herri desberdinetara, etab.-.

Bakoitzak atera ditzala bere ondorioak. Nik uste dut, hau ikusita, badela garaia ikasleontzako bidaitxartela ateratzeko, kontua da zergatik ez den egiten...