Goiena.net Blog Komunitatea

Eskatu zure bloga   Sar zaitez blogera

2010/08/30 11:18:11.699 GMT+2

Aiako Erregina

Aurten erreginaz hitz egin behar dugu, hirugarrenez irabazi baitu Maritxuk nesken artean Aiako igoera.

Bestela, hainbatetan gertatu den moduan, lehenengo aldiz parte hartu duen batek, Aldok hain zuzen ere,  egin du denbora onena. Erraz, bere gurpilari heltzeko gai inor ez baita izan.

Badirudi leku garaietan entrenatzeak on egiten duela, Izan ere, Aiarra eta Uberatarra dira urrearen jabe, eta zilarretako bat ere Uberara joan da, bestea berriz, Pirineotan indartu denak eraman du... Alturako txirrindularitza!

Dena den, ez pentsa lehiarik izan ez denik, ez horixe! Bigarrena, hirugarrena laugarrena eta bosgarrena elkarrengandik oso gertu ibili dira, eta ibilbidean zehar, postu aldaketa asko izan dira. Ikusteko moduko jarduna eskaini digute.

Aurten lau ziklista berri izan dira, Aldo (irabazlea), Jone eta Maddi (10-11 urteko gaztexoak) eta Liando (eternapromesa). Baina, era berean, hutsegite asko izan da, gehiegi.

Denboren taula osotua hauxe da:


izena
 2010 2009 2008
 2007
 2006
 2005
 2004
Aldo
 24:46
 -----
 -----
 -----
 ----- ----- -----
Juan Martin
 27:35 26:56 -----
 26:54 25:32 27:44 29:40
Imamol
 27:49 26:56
 -----
 27:20
 25:20 29:14 25:28
Thony 27:49 28:21 27:05 29:10 25:28 26:36 25:28
Pipi 27:54 ----- ----- 27:57 23:47 ----- -----
Xabier 31:38 30:45 ----- 37:47 ----- 33:45 28:15
Mikel 32:54 30:33 29:42 35:56 32:22 33:45 31:28
Maritxu 39:40 ----- ----- 38:18 38:49 39:11 42:35
Ines 41:41 42:52 36:43 41:47 38:56 ----- -----
MaddiM 46:52 ----- ----- ----- ----- ----- -----
Jone 46:52 ----- ----- ----- ----- ----- -----
Mari 46:58 40:07 42:17 43:07 39:08 35:52 39:50
Liando 47:05 ----- ----- ----- ----- ----- -----
joseba 47:05 31:39 42:17 35:02 39:08 32:25 30:33
Alberto
 ----- 26:56
 26:58 -----
 -----
 -----
 -----
Xavi ----- 34:34 ----- ----- ----- ----- -----
Leire ----- 39:02 42:17 ----- ----- ----- -----
Iñaki ----- 39:02 27:40 44:00 40:56 39:11 39:50
Koko ----- 39:14 ----- ----- ----- ----- 46:40
Boero ----- 42:52 50:00 ----- 39:08 55:?? -----
Xalegi ----- ----- 31:52 44:00 ----- 55:?? -----
Xubi ----- ----- 40:00 39:44 47:23 39:11 38:45
Idoia ----- ----- 40:44 44:00 40:56 ----- 39:50
Nerea ----- ----- 50:00 ----- 47:23 ----- -----
Xabin ----- ----- ----- 41:42 43:49 55:?? 50:23
Aran ----- ----- ----- 1:09:47 53:18 ----- 50:36
Ainhoa ----- ----- ----- 1:09:50 53:18 ----- -----
Ibon ----- ----- ----- ----- 44:22 55:?? 38:45
Itziar ----- ----- ----- ----- ----- ----- 43:13

Parte hartzaileen argazkia honakoa da:
2010_aiako_tropela  

Nork: makazaga.2010/08/30 11:18:11.699 GMT+2
Etiketak: bizikleta ziztazale aiakoigoera | Permalink | Erantzunak (0) | Errenferentziak: (0)

2010/08/02 17:46:19.230 GMT+2

Aubisque Argelesetik

Erori izanaren ondorioz bi egun atzeratu genuen Pirinioetarako plana. Baina osteguneko Tourmaleteko etapa bertatik bertara ikusteko aukera izan genuen.

Goiza euritan hasi zen, eta bizikleta ez hartzea erabaki genuen hiruk, beste biak, ordea, Tourmaletera joan ziren euriari aurre eginaz. Bermuta, bazkaria eta telebista aukeratu genuenok kostaldekoak gara, bizikleta aukeratu zutenak barnealdekoak...

Hurrengo eguna ateri argitu zuen, eta Aubisquera joateko plana egin genuen. Argelesen bertan geunden, eta aldapa herrian bertan hasten da, horregatik, berotu gabe aldapari ekin behar izan genion. Nire ezkerreko hanka ez zen oso gustura hasi aldapan gora, baina hasierakoa oso laburra omen zen eta ondoren atsedenaldia omen zegoen... Kaka zaharra! bost kilometroko aldapa da hasierako aldapatxo hori eta majo sufritu nuen.  Besteen abiadura moteltzen ari nintzen eta ez nindoan ondo. Buelta emango nuela esan nien. Horrela bakarrik eta presiorik gabe geratu nintzen.

Aldaparen profila honakoa da:
aubisque-profila

Lehenengo atsedenaldiaren hasieran bizikletatik jaitsi, luzaketa batzuek egin eta atsedenaldia bizikletean egokitzeko aprobetxatu nuen. Ondoren zazpi kilometroko igoera gogorra dago, batez beste ehuneko zortziko igoera. Kilometro batzuk %7.5ekoak dira baina beste horrenbeste %8.5ekoak. Gainontzekoek %8ko malda daukate. Mantso-mantso igo nuen aldapatzarra, eta Sulourreko gainean ondo merezitako zerbeza hartu nuen.

Zerbeza hartzen ari nintzela Aubisqueraino jarraitu ala behera itzuli erabaki nuen, eta erabakian Albertok esandakoak eragin zuen: handik gorainokoa ehuneko lau edo bost inguruko aldapa omen da. Beraz, gora jarraitzea erabaki nuen.

Hasiera aldapa behera da; eskuinean ikaragarrizko amildegia dauka eta bailara osoa ikus daiteke, ederra ikuskizuna! Baina berehala hasten da aldapa gora, hasieran lasai samarra, eta pixkanaka gogortzen da. Bukaerako hiru kilometroak berriz ere malda handikoak dira. Eskerrak gaineko eraikina ikus daitekeela! bukaerako hurbiltasun horrek indarrak ematen ditu. Albertok esandakoaz behin baino gehiagotan gogoratu nintzen azken kilometro horietan...

Gora iritsi bezain pronto Xubirekin egin nuen topo, beherantz egiten hastera zihoan (Beste hirurak Aubisqueren beste aldera jo zuten momentu horretxetan, bi aldeak igo nahi zituzten-eta), eta ni ikustean estralurtar bat ikusi izan balu bezala geratu zen. Kafe o le, grand bana hartu genuen eta herrira itzuli ginen biok.

FreeRunnerrak honako ibilbidea grabatu zuen:
aubisque-ibilbidea

Jaitsiera Xubik nik baino azkarrago egin zuen. Zergatik ote?


Bikelyra ere esportatu dut ibilbidea, eta bertan honako mapa ikus daiteke:

Nork: makazaga.2010/08/02 17:46:19.230 GMT+2
Etiketak: profila aubisque ziztazale argeles bizikleta ibilbidea pirinioak | Permalink | Erantzunak (0) | Errenferentziak: (1)

2010/07/18 09:54:50.193 GMT+2

Berriz ere lurrera.

Bai, berriz ere lurrera joan naiz, gainera, oso gogorra izan da.

Errezildik Azpeitira gindoazela, Azpeitiko sarrerako lehenengo biribilgunean erori nintzen atzo (10-VII_17). Sorpresaz hartu ninduen biribilgunerako sarrerak, izan ere oso sarrera txarra dauka, eta lurra bustita zegoenez, aurreko gurpilak irrist egin eta berriz ere lurrean arrastaka ikusi nuen neure burua. Baina hori ez da okerrena, biribilguneko sarrerako trafiko seinalearen kontra joan nintzen eta egundokoa hartu nuen.

Lurrean geratu nintzen, ezin jaiki eta egundoko oinazeaz. Lagunek anbulantziari deitu zioten, eta niri luze egin zitzaidan arren, berehala etorri omen zen.  Bitartean jendea inguratu zen, batek manta bat jarri zidan azpian, beste batek hanka airean heldu zidan, mina hantxe neukala argi adierazi bainuen, beste batek zira askatu...
Guztiei eskerrak eman nahi dizkiet, laguntzeko beti prest egoten baita jendea, eta hori handia da.

Azkenean anbulantziakoek anbulantzian sartu eta haserako azterketa egin zidaten. Basera deitu eta Donostiara eramango nindutela esan zuten, baina basekoak eremu hartatik ez azteratzeko agindu zuen, eta lehendabizi Azpeitiko anbulatoriora eraman nintzatela agindu zuen.
<
Bizikletak biribilgune ondoko baserrian laga, eta Imanol eta biok anbulatoriora eraman gintuzten. Hirugarrena, berriz, bizikletaz itzuli zen, anbulantzian bakarra sartu baizitekeen. Anbulatorioan zauriak garbitu, lasaigarri bat ziztada bidez sartu, odoleko azukrea kontrolatu (hori nire zurbiltasunagatik egin zuten), hotza emateko plasma jarri izterrean, mugikortasuna begiratu eta ez dakit zenbat froga gehiago egin zizkidaten. Ezer grabea ez neukala ikusi ondoren Mariri deitu zion Imanolek (bere deia ikustean egundoko sustoa hartu omen zuen) eta gure bila etortzeko eskatu zion. Bitartean, medikuak hurrengo eguna askoz okerragoa izango zela esan zidan...

Bai asmatu ere! Sorbaldan min handia daukat, belauna handituta, izterra gogor gogor eginda eta minberatuta, kubitoan edo radioan ere mina, baina batez ere Egoa daukat minduta.

Erorketa puntua hauxe da:


bizikleta istripua map

Bada beste putada haundi bat ere: hurrengo astean, Tourraren aitzakipean, egundoko plana geneukan pirineotan. Tourra ikusiz, Tourmalet, Aubisque eta agian hirugarren aldapatzarren bat igo nahi genituen. Ez dakit nola bukatuko duen plan eder horrek.

Nork: makazaga.2010/07/18 09:54:50.193 GMT+2
Etiketak: ziztazalebizikleta erorketa | Permalink | Erantzunak (3) | Errenferentziak: (0)

2010/07/16 15:13:05.244 GMT+2

Azurki. Maldaren azterketa

Azurkiko aldapak azterketa sakonxeagoa merezi duela iruditzen zait, horregatik aspaldian erabilei gabeko b5m zerbitzua erabiltzea pentsatu dut.

Aldapa bi zatitan banatu dut, bata Lasturren hasi eta harrobia pasa arte doan aldapatxoa, Bakarkoa baserri aurreko aldapa gogorraren hasieraraino hain zuzen ere. Zati honek 2.5 kilometro dauzka, eta azken 250 metroak aldapa behera dira. Hasierako 2.25 kilometroetan 150 m igo behar dira, alegia %6.6ko malda. Lastur 150 metroko garaieran dago, eta harrobia pasa ondoren dagoen Ugarte-berri baserria 300 metrotako altueran.  Ondoren, bideak pixka bat behera egiten du, 250 metro inguruko jaitsiera, eta 293 metrotaraino jaisten da (%2.8ko malda behera). Hor bigarren zatia hasten da: benetako aldapa! Lehenengo zatiaren profila hauxe da:

azurki_lasturretik_bakarkuara.6.6

Bigarren zatia, Bakarkoa baserria baino 100 metro lehenago hasten da, eta bukaera, berriz, gainean dagoen aparkalekuan kokatu dut. Zati honek 3.25 km dauzka, eta 625 metrotaraino igotzen da (293 metrotan hasita), beraz, %10.22ko malda dauka batez beste. Gora-behera gutxiko zatia da: beti gora, behera batere ez. Hala ere malda gutxitzen den gunerik ere badago, baina horrek esan nahi du %10.22ko  malda baino gogorragoko zatiak badaudela. Profila azpiko irudian ikus daiteke:

azurki_bakarkuatik_parkinera.10.3

Laburbilduz, 5.75 kilometrotan 475 m igo behar dira, batez beste %8.26ko malda, baina gogorrena bukaeran dago eta horrek asko zailtzen du igoera.

Nork: makazaga.2010/07/16 15:13:05.244 GMT+2
Etiketak: bizikleta lastur profila ziztazale azurki | Permalink | Erantzunak (0) | Errenferentziak: (1)

2010/07/14 11:02:44.523 GMT+2

Azurkiko igoera

Goitik behera bai, baina behetik gora ez dut gogoan inoiz igo izana. Azkenean, ordea, esan dezaket Lasturdik Madariagara doan bideko aldapatzarra igota daukadala.

Hiru abiatu ginen, baina gutako bat zakurtzar baten presentziaz beldurtu zen eta atzera egin zuen, berriz Itziar aldera. Beste biok ordea, zintzo igo genuen (mekaguendios batzuen laguntzaz, jakina).

Ibilbidea ederra da:


Bai eta profila ere:
 azurki

Ederki ikusten da aldaparen malda. Pena bakarra daukat: uztaila izan arren euri lanbrotan igo genuen, eta 20 metrotik haratago ez zen ezer ikusten, pena. Dena den, Azkoitia alderako bailaran lainorik ez zegoen eta gaineko "otarre" tabernako zerbezaren ondoren Azkarateko jaitsieraz disfrutatu ahal izan genuen. Pedalik ukitu gabe 76 km/h abiadura ikusi nuen nire aparatuan. Pelotoian a zer abiadura hartu ote daitekeen aldapa horretan!

Nork: makazaga.2010/07/14 11:02:44.523 GMT+2
Etiketak: madariaga profila zumaia ibilbidea azkoitia lastur ziztazale azpeitia azurki zarautz getaria bizikleta zestoa | Permalink | Erantzunak (0) | Errenferentziak: (0)

2010/06/20 19:11:31.021 GMT+2

Donostiako bariante berrian bizikletaz

Donostiako bariante berria bukatu dutela esan dute goizean irratiz, eta ekainaren 20an oinezkoentzat eta bizikletentzat bakarrik irekiko omen dute. Eta kasualitatez egun hori gaur zen, eta bizikleta buelta egiteko zita egina genuen.

Goizean, zitara joan aurretik, interneten sartu eta erdi lotan nengoela entzundakoa egiaztatu dut. Halaxe zen, Baiona alderanzko bidea oinezkoentzat, eta Bilbo alderanzkoa bizikletentzat.

Goizeko bederatzitan surtidorera azaldu eta Imamoli plana komentatu diot, ez du ezetzik esan, eta beste biei komentatuko geniela esan dugu. Xubi bost minutu berandu iritsi da eta ezin ezetzik esan. Laugarrena, berriz, ez da azaldu ere egin. Parrandero zikina!

Azkenean, hainbat aldiz egin izan dudan bidea hartu dugu, Donostiarako bidea, lanerakoa, alegia, eta Usurbileraino joan gara bertatik. Han, kalezahar aldera egin eta maldan gora egin dugu, autopistaren azpitik, igara auzora doan bidean. Izan ere, hantxe hasten da bigarren bariantea, eta bertarako sarrera han jarria zeukaten. Behin autopistan sartuta, Lezorano joan gara bertatik. Hori da jende mordoa zebilena! hori bai, bat ez beste denak mantso. Izan ere gaur kebrantahuesos eguna izan da, eta azkar ibiltzen diren guztiak hara joanda zeuden. Ibilbidea honakoa izan da:

donostiakobariantea
Berdez markatutako bidea egin dugu, GPSak hartutako bidea da, izan ere, oraindik mapetan jarri gabeko bidea baita. Neuk openstreetmap mapetan bide berria jartzea erabakita neukan, horretarako eraman dut openmokoa, baina norbaitek aurrea hartu dit, eta ni mapa aldatzen hasterako, beste horrek hasita zeukala ikusi dut, beraz, niretzat lan gutxiago!

Astelehenean bide berria mundu guztiak ikusteko moduan dago: edonork  openstreetmap mapetan Donostia ingurua begiratzen badu, bariante berria ere azaldu egingo zaio. "garaolaza" eta "birasuegi" erabiltzaileei esker.

Zein gauza ederra den elkarlanean mapa eguneratuta mantentzea!

Nork: makazaga.2010/06/20 19:11:31.021 GMT+2
Etiketak: donostia ziztazale usurbil orio bariantea ibilbidea errenteria | Permalink | Erantzunak (0) | Errenferentziak: (0)

2010/06/11 16:56:45.717 GMT+2

Zarautz Gernika Zarautz

Ala Zarautz Gernika Lekeitio... Izan ere, Zarauzko zikloturistek hain ondo antolatutako proba ez bainuen bukatu.  Aurtengoan ibilbide berria izan du:


Eta ibilbide horri dagokion profila honakoa da:
zarautz-gernika-zarautz profila
Nik, ordea, ezin izan nuen ibilbide guztia egin, 113. kilometroan, Lekeition, pedala ardatzetik atera zitzaidan eta kotxe-eskoban egin behar izan nituen azken 50 kilometroak. Hurrengo urtean beharko du. Baina Imamolek, zintzo, dena egin zuen bizikleta gainean! Bejondeiola.


Nork: makazaga.2010/06/11 16:56:45.717 GMT+2
Etiketak: aulestia ibarrangelu profila laida mutriku ea ziztazale gernika deba izpazter getaria lekeitio zarautz ondarru bizikleta itziar ibilbidea zumaiz | Permalink | Erantzunak (0) | Errenferentziak: (0)

2010/05/23 14:19:14.370 GMT+2

Matxinbentara joan etorria

Berriz ere ibilbide luzea egitea erabaki genuen: Matxinbentan bazkaltzen zenbat izango ginen esan beharra zegoen eta bertaraino joan ginen bigarren asteburuan jarraian. Bertakoek pentsatuko dute Zarauztarrok ez dakigula telefonoa erabiltzen...

Joana bide errezetik egin genuen, Azpeititik barrena, baina itzulera gure kebrantahuesos partikularretik egitea okurritu zitzaigun.

Horra ibilbidearen argazkia:

zarautz matxinbenta beizama errezil etumeta
Olentzeroren opariko GPSak markatutako bidea ageri da mapan. TangoGPS aplikazio librearen bidez ibilbidea grabatzen dit nire aparatu maitagarriak, eta gero grabatutakoaren argazkiak atera ditzaket, edota bikely.com-era esportatu. Halaxe egin dut, eta bikely bidez profila lortu dut. Horra profilaren argzkia ere:

matxinbenta_joan_etorria_profila Ikus daitekeenez, bukaeran daude aldapa gehienak, Ñuarbetik Santa Agedarinoko igoera eta Arzallusetik Etumetarakoa dira gogorrenak, baina tira, eguzkitan eta giro ederrean, txoriak entzunez, gehiegi sufritu gabe egin genuen goiz-pasa. Izan ere, 100 kilometro inguruko buelta da. Bost ordu bizikleta gainean.

Nork: makazaga.2010/05/23 14:19:14.370 GMT+2
Etiketak: iraeta santageda profila zumaia beizama zestoa ñuarbe ziztazale azpeitia errezil matxinbenta bidegoien etumeta zarautz getaria bizikleta ibilbidea arzallus aizarna | Permalink | Erantzunak (0) | Errenferentziak: (0)

2010/05/18 21:49:47.002 GMT+2

Danba! Lurrera.

Negu txarra egin du, eta ez gara asko ibili bizikletaz, baina eguna luzatu ahala, bueltaxka batzuk eman ditugu, batez ere Imamol eta biok.

Hala ere, maiatzaren 9.ean hirukotea osatzea lortu genuen eta Lekeitiora joatea erabaki.Horra ibilbidea:


Goizeko 9tan euria ari zuenez, beranduxeago abiatu ginen, eta poliki-poliki Itziarko gainera joan ginen. Han hirurok bildu (mantso zihoanaren zain egon) eta Debaranzko aldapa jaisteari ekin genion. Pedalei eragin gabe beheraino joatea erabaki nuen, baina Deba gaineko terraza modukoaren begira-lekuaren parean aurreko gurpilak irrist egin eta lurrera joan nintzen. Aldapa handiena bertan egongo da, eta abiadura handi samarra hartzen da pare horretan, beraz, lurrean irristaka hainbat metro egin nituen. Bizikleta bazter aldera, ni bide erdian aurrera eta erreminta potea bion artetik ziztu bizian... Eskuetan errea sumatu nuen, ondoren gerri edo izter ondoan, eta azkenik, bizkarka jarri bezain pronto, geratu egin nintzen. Eskuko behatzak odolduta, ukalondoa minduta eta izter aldean ere arrastatxoa. Besterik ez! Hori da hori suertea edukitzea (ez erori izanagatik, baizik eta erori eta hain ondo bukatzeagatik).

Kotxe gidari bat geratu zen eta kotxea eskaini zidan edonora eramateko (benetan jende ona badago munduan, bai horixe!), baina aberia handirik ez neukanez, eta bizikleta ere jarraitzeko moduan zegoenez, aurrera jarraitzea erabaki genuen. Deban trena ere har nezakeenez, aldapa jaistea bukatu ondoren erabaki genezakeen zer egin. Eta halaxe egin genuen, iturrian garbitu, taberna batean tirita batzuk eskatu eta erabaki: aurrera jarraitzea erabaki genuen. Eta egia esan behar badut erabaki egokia izan zen. Egundoko bizikleta buelta egin baikenuen. Pena bakarra aurten erositako bizikletako zamarra berriaren ukalondoari eragindako zarratak ematen dit...

Nork: makazaga.2010/05/18 21:49:47.002 GMT+2
Etiketak: ondoarroa zumaia lekeitio ziztazale deba mutriku zarautz getaria bizikleta itziar | Permalink | Erantzunak (0) | Errenferentziak: (0)

2010/02/22 23:57:11.852 GMT+1

Artritisa, belauna eta eskia

Aspaldiko partez artritisaren inguruko sarrera bat doa blogera, ez da seinale ona, baina zer egingo diogu, bada?

Eskiatzera joan ginen otsailaren erdialdera, pare bat egun eskiatzeko intentzioekin. Aretteko eski estazioa aukeratu genuen, autokarabana aparkatzeko leku egokia baitauka pisten oinean bertan, eta elektrizitatea eta komunak ere eskura baitauzka.

Eguraldia mundiala geneukan, eguzkitarako krema ere eman beharreko egun horietakoa izan baitzen, eta han jardun genuen gora eta behera elurrez ondo betetako pistetan. Eskiatzeko bizioa daukatenentzat egun aparta benetan. Baina... hiru edo lau ordutan topera jardun ondoren, ezkerreko hanka geratzeko eskatzen hasi zen, eta ez zen nekearen eragin hutsa, ez eta orkatilaren mugimendu mugatuaren ondorioa ere. Belauna ari zen atseden eske. Aikejoderse!

Erreumatologoarengana joan nintzenean, medikuari berari ere komentatu nion belauna, ezkerrekoa, orkatila txarraren gainekoa, ez zebilela oso fin, eta, nire ustetan, erren egitearen ondorioa izan zitekeela ere esan nion. Plaka pare bat ateratzeko agindu zidan hurrengo bisitarako.

Uste dut eskiatzeko saioak nire beldurrak egiaztatzen dituela, eta belaun horri kasu gehixeago egiten hasi beharko dudala iruditzen zait, izan ere, lanean eserita ari naizenean belaunak bidaltzen dizkidan egonezinak ez zaizkit batere gustatzen; postura egokia aurkitu ezinik ibiltzen naiz...

Eskiatzen jardun ondoren, arratsaldean, atseden hartzea erabaki nuen (dagoenekoz hasi naiz belaunari kasu egiten!) eta Mari eta umeek eskiatzen pare bat ordu gehiago pasa zituzten arren, nik uko egin nion. Eta hurrengo egunean ere ez nuen eskiatu, bizikletaz Arettera jaitsi nintzen, gero 23 kilometroko aldapa gogorra igotzeko asmoz ... Beno aldapa 18 kilometrokoa dela esan daiteke, baina hori beste batean kontatuko dut: a zer aldapatzarra!!

Nork: makazaga.2010/02/22 23:57:11.852 GMT+1
Etiketak: artritisa eskia belauna ziztazale minak | Permalink | Erantzunak (0) | Errenferentziak: (0)


Estatistikak