Zahar-Berri

Txema Auzmendi bikain!

zaharberri — Fri, 21 Nov 2008 12:13:28 +0100

Atzo, Azaroaren 20an, osteguna, Txema Auzmendi izangenuen AEDko txokoan. Txemak euskara ikasi behar izan zuen heldua zenean, txikitan bere ikaskuntza prozesua moztu baitzioten. Bere istorioa ezagutzeko aukera izan genuen atzo eta, honekin batera, euskara ikasteak ekarri dizkion poztasunak (eta nekeak) adierazi zizkigun. Bertaratutakoek euskara oso garbian istorio pertsonal eta interesgarria entzuteko parada izan genuen. Hurbildu ziren ikasleentzako ziur adierazi zituen poztasun eta neke batzuk aski ezagunak izango ziren. Jakin badakigu euskara ikastea oso prozesu luzea eta “zaila” dela egungo ikasleentzat. Hitzaldi honi esker egiten duten esfortzua baloratu izana espero dugu eta, horrela, hemendik aurrera gelditzen zaien bidaia poztasunez betetzea!! Eskerrik asko, Txema!!!

Legazpiko Burdinaren Museora bisita

zaharberri — Wed, 19 Nov 2008 17:42:16 +0100

Datorren astebukaerako irteera bat antolatu dugu Zahar Berritik. Legazpiko Euskal Burdinaren Museoa ikustera joango gara azaroaren 22an, larunbatean. Goizeko 10:00etan geldituko gara Garibaiko autobus geltokian eta kotxeetan Bergarara joango gara han Berriketan-ekoekin elkartzeko eta guztiok batera Legazpira joateko. Bazkaltzeko itzuliko gara, beraz, animatu!!

Izena emateko deitu Zahar Berrira!

Txema Auzmendi hizlari

zaharberri — Wed, 19 Nov 2008 17:28:47 +0100

Azaroaren 20an, ostegunean, Txema Auzmendi izango dugu hizlari. Txema eskarmentu handiko gizona da eta gurera etorriko da euskaldun berria izan zen denbora nola bizi izan zuen kontatzera. Gaur egun euskaldun osoa dugu. Beraz, oso interesgarria izan daiteke prozesu horretan hainbeste izerdi botatzen ari duen ororentzat. Ez galdu hitzaldi interesgarri hau entzuteko parada eta hurbil zaitezte AEDko egoitzara azaroaren 20an 18:00etan. Espero zaituztegu!

Zaharberriko hasierako afaria

zaharberri — Mon, 27 Oct 2008 14:59:22 +0100

2008-2009 ikasturteari ongietorria emateko joan zen ostiralean, urriaren 24an, kurtso hasierako afaria egin genuen. Afaria Larrinoko elkartean izan zen eta bertaratu ginenok bapo afaltzeko aukera izan genuen. Guztira bederatzi pertsona egon ginen eta, Txantxiri esker, asko disfrutatu genuen afariaz, giro lasai eta ederrean. Kurtso amaierako afarian jende gehiago agertzea espero dugu, nahiz eta sukaldariarentzako lan gehiago izan!

Hemen daukazue afarian izan ginenon argazkia.

2008ko urriko Euskaltegiko ekintza: opor-diapoak

zaharberri — Mon, 20 Oct 2008 10:24:10 +0200

Euskaltegiek ekin diote beraien martxari: aditzak, esaldiak, gramatika, perpausak, sinonimoak... Hilean behin, Zahar Berriri esker, ikasleek klaseetako errutinatik askatzeko aukera dute. Autengo lehen ekintza argazki proiekzio bat izan da, iaz bezala. Ikasleek beraiek erakutsi zituzten argazkiak eta baita hauei buruzko azalpenak eman ere. Holanda, Zaragozako Expoa, Extremadura, Huelva, Errusia... hobeto ezagutzeko aukera izan genuen bertaratutakoek. Argazki asko eta politak ikusi genituen.

Hona hemen diapo-emanaldian ateratako argazki batzuk:

Euskaltegiko Ekintzak: 2008ko Urria. "oporretako diapoak"

zaharberri — Tue, 14 Oct 2008 13:17:14 +0200

Ikasturtea hasi eta berarekin batera, martxan ditugu dagoeneko Zahar Berrik antolatzen dituen hileroko Euskaltegiko Ekintzak.

Iaz bezala, aurten ere, euskaltegietako ikasleen oporretako argazki bildumak eta hauen azalpenak ikusi eta entzunaz hasiko dugu ikasturtea.

Horretarako ez ahaztu aste honetan bertan, urriaren 16ean, ohikoa ohiturari jarraiki ostegunez, duzula hitz ordua! Iaz bezala, ekintza bera goiz zein arratsaldez errepikatuko da; goizeko ekintza 9:30etan eta arratsaldekoa berriz 6etan izango direlarik. Biak ere, AED-ren txokoan.

Bertan ikusiko dugu elkar!!

Afaria!!

zaharberri — Tue, 30 Sep 2008 12:31:58 +0200

Urriaren 24ean, ostiralez, Zahar Berrik ikasturteari hasiera eman asmoz, afaria antolatu du. Beraz, badakizu! Gurekin batera lagun artean gustura izan eta osteratxoa egin nahi baduzu, utzi lotsa eta zatoz gurera!! ANIMATU!!

Afarirako ordua eta lekua aurrerago zehaztuko ditugu.

2008-2009_Ikasturteko egitaraua

zaharberri — Tue, 30 Sep 2008 12:13:09 +0200

2008 - 2009 ikasturte hasiera!

zaharberri — Thu, 25 Sep 2008 11:33:03 +0200

Beste behin, udako oporrak pasatuta, ikasturteari hasiera eman nahian aspaldian albo batera utzitako blog hau astindu eta haize freskoz gatozkizue!

Iaz aritu ziren Berba lagun talde gehienek aurten ere gure artean jarraituko dutela jakiteak, benetan pozten gaitu eta, horregatik, guztiei gure ZORION eta ESKERRIK beroenak. Izan ere, euren partehartzerik gabe gure egitasmoak ez luke aurrera egiterik izango!!

Bestetik, zalantzan zaudeten guztiok animatu nahi zaituztegu!! Eta euskal giro ederrean, lagun arte berrian ongi pasatuz, ekintza ezberdinetan parte hartzeko aukera ezin hobea baituzu gure artean!!

Beraz badakizue! Zeren zain zaudete? ANIMATU eta dei iezaguzu!!

ZAHAR BERRIK ERE IKASTURTE BUKAERA

zaharberri — Mon, 07 Jul 2008 17:27:26 +0200

Uztaila hasi eta ikasturtea bukatu. Hainbatek bezala Zahar Berriko Berba lagunek ere, uda garaia eta abuztuko oporren aitzakian egunerokotasuna alde batera utziaz, iraila - urria etorri bitartean eten aldia izango dute. Gehientsuenak “opor luzeak” hartu eta kanpora jo alde, edo beste batzuk, deskantsatzeko aprobetxatuz, taldeek ere deskantsua hartu eta bueltan indarberriturik berriz ekingo diote.

Urtean zehar izandako ekintza, lehiaketa, irteera eta ikastaroak atzean utzi ondoren, uztailean oraindik ere, elkartzeko azken parada izan dute. Neguan horren preziatua den kafe beroa alde batera utzi eta freskagarri zein pasten inguruan batu dira. Urteko gora-beheren gainean jardun, udarako planen nondik norakoak eta hurrengo ikasturterako proposamenak egiteko aukera. Baita partaide guztiei euren borondate on zein gogoa eskertu eta saritxoak banatzeko parada ezin hobea ere!