Piperrautsa

Kargante egiten zait uda sasoi hau. Hainbeste, ez dudala aspaldian opor luzerik hartzen udan, ez jasatearren artaldean ibiltzeak dituen astuntasunak. Baserrian bizi naizenetik, asko estimatzen dut zirkuitu jendetsuetatik aparte egotea, bake ederrean. Eta Arrasaten lanean eman ditudan udetan, gozo asko joan izan naiz lanera, bide libreetan zehar, erdi hutsik gelditutako herrira.

Orain Donostiara noa egunero, eta oso bestelako panorama daukat han: jende oldeak,  autoaz sartu-irten gatazkatsuak, nekea edozein urrats egiteko… Espaloi jendez beteetan barrena, saiatzen naiz imajinatzen gorputz erdi biluz eta azal arrosen atzean egon daitezkeen historiak, baina apenas pizten didaten interesik. Gustura itzultzen naiz mendi arteko gordelekura.