Piperrautsa

Atzoko Pais egunkariak inkesta zekarren Catalunyako hauteskundeei buruz. Duela hiru urtekoen aldean, apenas aldaketarik. Gertatu direnak gertatu eta gero! Gogora dezagun.

CiUk atera zuen parlamentari gehien, baina hirukoitzak hartu  Generalitat-eko gobernua. Nahi zuten ezkerreko politika saio bat egin eta, bereziki, 23 urtez gobernuan zegoen CiU oposiziora bidali. Hitzarmen zehatza sinatu zuten, lehen tokian jarrita Estatut berriaren aldarrikapena.

Gero etorri ziren Carod eta Maragallen aitzakiak, Madrilgo hedabideetan gurutziltzatuak izateko; Estatut-aren negoziazio zaila eta edukien mardultasuna; Mas-en eta Zapateroren maltzurkeria, eduki horiek uretan mehetzeko; azkenik, ERCren zaputza, gobernua utzi beharra eta hauteskundeak aurreratzea. Zalaparta arteko strip-teaseak, bata bestearen ondoren.

Hori guztia ikusita, ulertuko nukeen abstentzio oso altua, aporai! esanda. Edo Mas nagusitzea listoena delako, Carod inozoena, Montilla madrildarrena, Saura saiatuena edo Piqué bera jasanezinena delako. Baina, lehengo egoera bera errepikatzea!

Atzo, bazkalondoko tertulian,  ibili genuen egunkariekiko leialtasunaren kontua, ze zaila den jendeak egunkariz aldatzea, bere pentsamoldearen kontrakoa izan arren.

Biak lotuta, ondorioa: itxuraz moderno, baina ze kontserbadore den jendarte hau, bizi garena!