Piperrautsa

Enrike lagun harakinak sarri aipatzen zidan Goenkale: Hor pasetan dienak ez dittuk badaezpadakuek, zertzuk asmetan dittuen! Alegia, sinestezinak egiten zitzaizkiola pertsonaien bueltak eta errebueltak.

Bada, ordea, beste esaldi bat: Errealitateak gainditu egiten du maiz fikzioa. Eta hau egiaztatu egin dit senitarteko gertakari batek.

Osaba bat golfo samar izan eta, nonbait, eskuzabal ibili zen gazteagotan, hazia han eta hemen isurtzerakoan. Eta, gutxienez behin, hazi horrek bizia piztu zuen eta lehengusina bat jaio zitzaigun, noizbait nonbaiten. Baina gorde-gordeka ibili dira alde guztiak, eta azkenean lehengusinak berak aurkitu behar izan du bere jatorria eta dagokion familia. Duela bi hilabete izan genuen haren berri, eta jakin gu ezagutzeko irrikitan zegoela. Berehala gonbidatu genuen urtean behingo lehengusu-lehengusinen bazkarira.

Larunbatean izan zen bazkaria Elorrion eta azkenean ezagutu genuen lehengusina. Oso momentu hunkigarriak bizi izan genituen, bereziki gutariko hiru neskek aurreskua dantzatu ziotenean, senitartera ongietorria emateko. Askoren begiak busti ziren une horretan.

Bide luzearen ondoren, lehengusina iritsi da bere jatorrizko familiarengana eta poz-pozik itzuli zen etxera, Bartzelonara. Elkartuko gara nahi bezain sarri, orain eskura gauzka. Niri geratzen zait azaltzea Enrike lagun harakinari, Goenkalekoak inoiz benetan ere gertatzen direla.