Giroa barrutik

Gaurko zutaberako gertatuta daukadana kontatu aurretik gaur nahiko txukun amaitu dugula aurreratu gura dut. Lastima Alanek ezin izan duela azken metroetan etapa errematatu. Nik, berriz, jaitsieretan sufritzen jarraitzen dut, eskuak min egiten dit-eta. Ea poliki-poliki errekuperatzen naizen.

Beno, Giroko egun bat zelakoa den azalduko dizuet gaur, eta egia esateko, denak ere nahiko antzerakoak dira. Gutxi gorabehera egunero-egunero gauza antzerakoak egiten ditugu, oso metodikoa da dena, eta esango nuke talde guztietan gertatzen dela gauza bera.

Etapa hasi baino 3 ordu lehenago esnatzen gaituzte. Gaur, esaterako, 07:30ean jaiki gara, baina normalean 08:30ak aldera esnatzen gaituzte. Jaikitzeaz batera gosaltzera joaten gara; etapa batzuetan zazpi mila kaloria erretzen ditugu, horrenbestez, gura beste gosaltzen dugu: pasta, tortilla, zerealak, tostadak... Ondo gosalduta gelatara igo, eta maletak prestatzeko ordua da. Maleta handia masajistek hartzen dute –handia eta txikia ditugu–, eta txikian kaskoa, zapatillak... etaparako behar ditugunak sartzen ditugu.

Etapa hasi baino ordubete lehenago iristen gara irteera puntura, eta han zuzendariaren aginduak entzun eta etapa aztertzen dugu. Hortik aurrerakoaren berri ondo dakizue, eta lasterketa amaitutakoan presaka ibiltzen gara berriro ere. Autobusean bertan dutxa bat hartu, zereal batzuk esne apur batekin edo meriendatu, eta hotelera buelta –orain arte, kilometro mordoa egin behar izan dugu bidaian–.

Eta hotelera iritsitakoan ere, berritasun gutxi. Lau masajista ditugu gurekin, eta masajea hartzen dugu –astia dagoenean–. Gero, afaltzera joaten gara, 20:30ak inguruan, eta afalostean taldekide guztiok batera egiten dugu tartetxo bat, deskafeinatu bat-edo hartzen. Ondoren geletara igotzen gara, gelakidearekin minutu batzuk lasai egon, eta lotara. Orduan ibiltzen gara Irizar eta biok, elkarri batallatxoak kontatzen. Egun erakargarria, ezta?

Iban Velasco