Faroa

Pertzepzioak

Joxe Aranzabal — Fri, 03 Jul 2009 08:00:29 +0200

Udaberrian lagun batek esan zidan berak bi Joxe ezagutzen dituela: bata birtuala eta bestea erreala. Lehena blogean agertzen da, eta ez dauka lotsarik bere buruaz hitz egiteko, batzuetan “harrokeria puntu bategaz”. Joxe hori, birtuala, horrela dabil pozik eta askatuta, haren ustez. Joxe erreala, ostera, oso bestelakoa omen da, isilkorra.

Orain dela gutxi, berriz, beste batek aurpegiratu dit ni famatua banintz, Jezulin Ubriquekoaren emaztea-eta bezala ibiliko nintzatekeela, telebistaz telebista, dirua egiten nire kontuak kanporatzearen truke.

Faroa blog pertsonala da, eta egia da bertan nire kontuak ere kontatzen ditudala zenbaitetan, blogak egunerokoak ere izan baitaitezke (ez ahantzi bitakora ere esaten zaiela), baina hortik exibizionismoa egitera bide luzea dago, eta uste dut oraindik ez naizela muga horretara iritsi.

Hala ere, bistan da oraindik ere jende askorentzat jarduera birtuala harroa edo exibizionista izan daitekeela, ukitu pertsonalak baldin baditu. Zer egingo diogu, bada!

Zergatik adimen mapak

Joxe Aranzabal — Thu, 02 Jul 2009 08:27:19 +0200

Orain dela gutxi, Dan Woods kazetariak artikulu bat idatzi zuen Forbes.com aldizkarian adimen mapen ahalmenaz. Horrela zioen:

Adimen mapa batean ideiak harrapa ditzaket elkarrizketa batetik edo diseinu bat liburu baterako, eta ez naiz sentitzen zapuztuta edo nekatuta. Ikuspegi lineala utzita, eremu bidimentsional batean sartzeak aukera ematen dit bizkor mugitzeko, ideia bat dagokion tokian jartzeko saguaren bidez batetik bestera mugituz, xehetasun maila zabalduta edo txikituta, beharren arabera. Hau guztiau bizkorra eta erraza denez, ideia gehiago harrapatzen ditut eta bizkorrago berregituratzen. Era horretan, nire adimen mapak hobeto ispilatzen du nire ulermena. Itzultzen naizenean adimen mapa batera, berehala datorkit testuingurua, hura egiterakoan pentsatutakoa; ezer ez da galtzen. Ez dut beldurrik izaten. Adimen mapak handiak eta konplexuak izan daitezke, eta berauen sakontasuna kontrolatzeko, hedatu edo uzkurtu egiten ditut besoak. Sarri erabiltzen ditut adimen mapak antolatzeko eta aztertzeko beste inon dudan informazioa, hala nola Salesforce.com enpresan sortzen zaizkidan aukerak.

Euskaltzale tipologia berria

Joxe Aranzabal — Wed, 01 Jul 2009 08:00:47 +0200

Zenbait jendek galdetu dit nortzuk diren euskaltzale horiek, goiko diapositiban agertzen direnak, ikusi dituzte-eta Internet elkarrizketa da aurkezpenean, eta ez dituzte ezagutu. Ezkerretik eskuinera goiko ilaran: Iban Arantzabal (Goiena.net), Maite Goñi (Euskaljakintza) eta Jabi Zabala (Sarean.com). Beheko ilaran, Arkaitz Zubiaga (Zabaldu.com), Gari Araolaza (Tagzania) eta Gorka Julio (Teketen.com).

Aurkezpen hartan esan nuen Interneten inguruan sortzen ari dela euskaltzale tipologia berria, honako ezaugarri hauekin:
   •   Gaztea.
   •   Euskaltzalea.
   •   Software librearen aldekoa.
   •   Sarean lan egiteko prest.
   •   Lana boluntario gisa egiteko gertu.
   •   Komunitate zentzu handiarekin.
   •   Teknozalea edo teknologia erabiltzeko prest, euskararekin batera.
   •   Multimedian hazia.
   •   Profil askotarikoa: informatikaria, irakaslea, ikaslea…

Argazkiko izenetatik aparte, beste hainbat izen aipatu nituen: Luistxo Fernandez, Ana Malagon, Patxi Gaztelumendi, Jokin Lacalle, Josi Sierra, Leire Narbaiza, Haritz Rodriguez eta Joxe Rojas, besteak beste. Zorionez, badira gehiago ere, baina diapo batean sei baino ez zitzaizkidan sartzen.

Bleu

Joxe Aranzabal — Tue, 30 Jun 2009 08:00:21 +0200

Bleu lehen aldiz ikusi nuenean, liluratuta geratu nintzen; filmak, musikak eta Juliette Binochek prendatuta. Atzo bigarrenez ikusi nuen, eta berdin: a zelako emozioa transmititzen duen musikak! Eta zer esan Juliette Binochez? Zoragarri zegoen.

Rouge filma ere ikusi nuen —atzo zine eguna izan nuen etxean, Eskoriatzako jaiak aprobetxatuta—, eta, gustura ikusi nuen arren, ez ninduen hunkitu trilogiako lehenak bezala. Orain hirurak ditut ikusita —Bleu, Blanc eta Rouge—, baina badakizue niretzat zein den onena.

Irizartarrak, RW. Aranzabaldarrak, RO

Joxe Aranzabal — Mon, 29 Jun 2009 08:00:05 +0200

Lawrence Lessig irakasleak ederto azaltzen du Remix liburuan zelan gramofonoaren aurretik kultura RW erakoa zen, alegia, Read/Write, gaurko geek-en hizkuntza erabiltzeagatik. RW kulturan, jendea etengabe ari zen abestien bertsioak egiten, horretarako ahotsa eta musika instrumentuak erabilita. Gramofonoak, diskoak eta enparauek, berriz, RO kultura ekarri zuten, alegia Read/Only kultura, non jendeak kontsumitu egiten baitu kultura, modu pasiboan, berau sortu edo birsortu barik.

Gurean oso garbi ikusten dut bereizketa hori. Esteñibar baserrian, Elorrion, Irizartarrak eta Aranzabaldarrak elkartzen gara. Irizartarrak RW eran ulertzen dute musika, etengabe ari baitira euren gogoko abestien bertsioak egiten, ahotsak edo instrumentuak erabilita: gitarra, alboka, trikitixa, panderoa, txirula edo gaita. Aranzabaldarrok, ostera, gozatu egiten dugu musika, baina beste modu batean, berau entzunda. RO petoak gara.

Night Ripper: remix adibidea

Joxe Aranzabal — Fri, 26 Jun 2009 08:00:44 +0200

Greg Gillis ingeniari biomedikoa da, eta orain 28 urte jaio zen Pittbusrgh hirian, AEBetan, baina mundu guztiak ezagutzen du Girl Talk bezala, izen horrekin egiten baitu musika, mash-up edo remix estiloa erabilita. 2006an Night Ripper kaleratu zuen, sei minutuko remix bat, non Gillis gazteak nahastu zituen 200 eta 250 musika zati inguru, 167 artistaren lanetatik hartuta. Rolling Stone eta Pitchfork aldizkariek izendatu zuten Night Ripper urteko albumik onenetakoa.

Hil liburua 2.0

Joxe Aranzabal — Thu, 25 Jun 2009 08:00:59 +0200

Aspaldiko ezagun baten heriotza tarteko, aurkitu dut enpresa bat, Legacy.com, eskaintzen dituena hainbat zerbitzu online, hildakoak ohoratu eta gogoratzeko. Zerbitzu nagusia hil liburua iruditu zait, non hildakoaren ezagunek idatziak eta argazkiak partekatzen baitituzte.

Gure kasuan, The Idaho Statesman egunkariak eskaini zigun bidea sinatzeko Adamen familiak sortutako hil liburuan. Nahi baduzu hildakoaren familiak zurekin harremanetan jartzea, idatzi zure helbide elektronikoa, inork ez baitu ikusiko.

Idatzi duzun mezuari dagokionez, enpresak gainbegiratu egingo du, argitaratu aurretik. Kasu horretan, email bat bidaliko dizu, esanez zure mezua onartu egin dela, laster argitaratzeko. Ez badakizu zer idatzi, enpresak berak iradokiko dizkizu hainbat esaldi, zuk aukeratzeko. Nahi izate aldera, bestalde, hil liburuaren jarraipena egin dezakezu, mezu bat gehitzen den aldiro Legacy.com-ek mezu bat bidaliko baitizu horren berri ematen.

Hil liburua urtebete inguru egongo da online. Denbora hori igarota, aukera duzu liburua paperean inprimatzeko, txukun-txukun, edo webgune bat sortzeko, hildakoaren memoria iraunarazteko. Aukera bakoitzak, noski, prezio bat du, baina iruditu zait Legacy.com-ek oso ondo aprobetxatzen dituela Web 2.0 erremintak zerbitzu dinamiko eta eraginkorra sortzeko. Nor animatuko da gure artean horrelako zerbait egiten?

Euskal kooperatiben oihartzuna nazioartean

Joxe Aranzabal — Wed, 24 Jun 2009 08:00:39 +0200

George Cheney irakasle estatubatuarrak badu liburu bat, Values at Work, non aztertzen dituen Euskal Herriko kooperatibak. Cheneyk hitzaurre bat gehitu zion liburuaren bigarren argitalpenari, eta hor aipatzen du Mondragon taldeko kooperatibek zelako oihartzuna duten munduan. Hona hemen berak aipatzen dituen esperientziak:

San Frantsiskon, AEBetan, Mike Miller Social Policy aldizkariko argitaratzaileak sarri erabiltzen du Mondragon taldearen adibidea, erakusteko ekonomia alternatiboek zelako posibilitateak dituzten, eta argudiatzeko kooperatibetan oinezko langile-jabeek ere behar dutela ordezkaritza independentea.
Baita San Frantziskon, AEBetan, Dave Karoly eta Tim Huet laguntzen ari zaizkie enpresa hasiberriei, hala nola Arizmendi okindegi eta pizzeria kateari, lotura egin dezaten bertako Rainbow Grocery kooperatiba indartsuarekin.
Missoula herrian, Montanan, Dean Ritz eta Jeannette Rankin Peace Center delakoa antolatzen ari dira eztabaida sorta bat, Demokrazia definitzen, aurre egiteko enpresen kontrol kontzentrazioari.
Chuck Sperry eta bere lagunak Mondragon moduko kooperatiba esperientziak antolatu nahi dituzte Rocky mendien inguruko basomutil eta nekazarien artean, Rocky Mountain Center for Economic Democracy erakundearen bidez.
Cape Bretonen, Nova Scotia probintzian, Kanadan, Greg McLeod eta bere lagunak jardunaldiak antolatzen ari dira Ipar Ameriketako jendearentzat, bertan aztertzeko Mondragon taldearen arrakasta historiak. McLeod-ek berak liburu bat dauka, From Mondragon to America: Experiments in Community Economic Development.
Auckland hirian, Zeelanda Berrian, Manase Lua ari da enpresa haztegi bat indartzen Tongan jendearentzat, eta horretarako Euskal Herriko kooperatiben kasua darabil eredu gisa.

What Would Google Do?

Joxe Aranzabal — Tue, 23 Jun 2009 08:00:17 +0200

Dagoeneko hainbat aldiz aipatu dut liburu hau, What Would Google Do?, baina oraingoan bereziki gomendatu nahi dizuet, liburu aparta iruditu zait-eta. Jeff Jarvis kazetariak idatzi du, eta bertan jasotzen du Internet zelako aldaketa handiak eragiten ari den gure kulturan, negozioetan eta bizimoduan.

Kontuan hartuta Google dela enpresarik esanguratsuena Internet aroan —Amazon, eBay, Facebook, Craigslist eta Wikipediarekin batera, besteak beste—, egileak aztertzen du zelakoak izango liratekeen gure enpresak eta erakundeak —auto enpresak, unibertsitateak, egunkariak, administrazioa, etxe agentziak, etab.—, baldin eta beren jardueran aplikatuko balituzte Googlek-eta ezarri duten lan metodologia.

Ahal baduzue, irakurri liburua. Udarako Millenium trilogiaren osagarri egokia izan daiteke.

Bekatxoa

Joxe Aranzabal — Mon, 22 Jun 2009 08:00:12 +0200

Joan den osteguna ezkero pikorta bat daukat betazalaren beheko ertzean, ezker begian, eta horrekin nabil amorratuta, oraindik ez da-eta desagertu, nahiz eta tantak ematen ari naizen konjuntibitisa osatzeko, antza denez horixe baita bekatxoaren eragilea.

Atzo lagunarteko bazkaria izan genuen, eta bertan hainbat izen entzun nituen era horrelako pikorta izendatzeko, lagunen jatorriaren araberakoak:

Mimor, Mondragoen.
Begitxindor, Elorrion.
Erle-kisten, Goierrin.

Behin etxean, Hiztegi Batuan begiratu nuen, eta hor bekatxo agertzen da. Galdera egin nahi dizuet bekatxoa izan duzuenoi: zelan osatu duzue? Mila esker, aurretiaz.