Faka faka

Turbo eta Ehiztaria: Txapelketa negargarria jokatu dute. Turbo galduta ibili da. Maiteminduta egongo balitz bezala. Zeruan. IPhone-a eskuetan duenean erakusten duen lehiakortasuna eta hiltzaile sena falta izan zaio eskularru gorriekin. “Bizkaitarra”, berriz, ehizatik bueltatzen denean bezala atera da frontoitik: esku hutsik.

Golden Boys: Gehien hazi den bikotea. Glamourra, lehiakortasuna eta ikuskizuna uztartu dituzte. “Bankeruak” tako barik jokatu du. Impresionante! Bestalde, aurten izan duen hobekuntza ikusita babesleak saritu egingo du aurrelaria. Kutxak harribitxizko guante bereziak egingo dizkio datorren urterako.   

Marijaia eta Panaderito de Bergara: Talde eskasenean jokatu arren, txapelketa txarra egin dute. Panaderitok huts egin du. Ez du ustez dituen dohainen berri eman. Marijaiak, berriz, benetako gizona dela erakutsi du. Bi gauza batera egiteko gaitasunik ez duela ikusi da. Umea zaindu eta pilotan jokatu, hain zuzen ere. Gazteenak adinez aukerarik izan ez arren, beteranoekin aritzeko daudela erakutsi dute.

Berna eta Judas: Onenen artean egoteko aukera izan duten bakarrak. Baina partida erabakigarrian aurrelariak saldu egin zuen atzelaria. Judasek uko egin zion jokatzeari gaixo zegoela argudiatuz. Inork ez dio sinetsi. Galgo auzian inplikatuta egon daitekeela uste da, eta azken neurketarako pizgarririk lortu ez zuenez gurago izan zuela kontzertu batera joan. Berna, berriz, kuadrilako onena izan da, baina azken partidan huts egin zuen estrategian.

Beverly-ko paketeak: Bizitza erosoa izan dute. “Akomodatuta” daude eta hori nabarmen ikusi da kantxan. Ez dute goserik erakutsi. Txapelketa hasi arte “Kalen” ezizenez ezagutzen genuena “Kale” da orain. Diego, berriz, frontoian urduri ipintzen den lehen errioxarra izango da. Ikaragarria. Hala ere, jardunaldiak jokatu ahala hobetu egin dute.

Clembu: Ordezko gisa aritu da. Bere jokoa gorabeheratsua izan da. Partida onak eta erdipurdikoak tartekatu ditu. Emazteak Irunetik ekarritako okela jan duen asteetan maila ona eman du, baina nabarmen egin du behera Elgeta ingurukoa kontsumitu duenean. Bestalde, ume bi izateko gerri gogorra daukala ikusi da. Kosta egiten zaio makurtzea.

MaraVilla: Bi partida besterik ez ditu jokatu. Hala ere, nahikoa izan da bere dohainen berri izateko. Pelotari ezberdina da: azkarra, koordinatua eta berezia. Kantxan  ibiltzeko jaio da. Aurrez Ogueta zenak eta Titin-ek egin zuten legez, iraultza ekarriko du pelotara. Adituek diote XXIII. mendera arte ez dugula antzeko pelotaririk ezagutuko.