Iruña-Veleia, gezurra ala egia?

Otsailaren 3an azaldu zen Lorena Lz de Lacalle Euskera, Kirol eta Kulturako Diputatua Arabako Batzar Nagusien aurrean. Joan den urteko azaroaren 6an eskatu arren agerraldia, ez da orain arte azaldu, agenda arazoak argudiatuz. Agerraldiaren helburua AFA eta EHUren artean azaroan sinatutako Konbenioaren berri ematea zen arren, diputatua ez zen ia honetaz mintzatu. Julio Nuñez irakaslea izan zen batzarreko protagonista, denbora luzez jardun baitzuen berak gidatzen duen Plan Zuzendaria aurkezten. Laburtuz, lehengo ekipoak dena egin zuen gaizki, dena  desastre hutsa izan zen, eta eurak aztarnategia salbatzera datoz, eta presa handia dago, alferrik galtzeko arriskuan dagoelako.

Aralarrek, Iñaki Aldekoaren bidez, gogoratu zion agerraldiaren helburua ez zela Plan Zuzendaria aurkeztea, Konbenioa baizik. Dagoeneko exekutatuta dagoela Konbenioa, eta aurrekontuko 100.000 euroak ordainduta, oraindik Batzar Nagusiei aurkeztu ere egin ez zaienean. PSE-k ere, Virgilio Bermejoren bidez, gogor kritikatu zituen Kultura Diputatuak auziaz hartutako erabakiak, eta gehitu zuen ez zuela ulertzen nola deskalifika zezakeen hain modu zakarrean aurreko taldearen lana; eta, Aldekoak bezala, plana martxan jartzearen arriskuak nabarmendu zituen, oraindik "sub judice" dagoelako eta epaileak geldi dezakeelako.

Lorena Lz de Lacallek Iruñan Walt Disney berri bat egin nahi izatea leporatu zien Lurmenekoei. Hori izan zen eguneko perletariko bat. Hurrengo eguneko prentsan ez ziren ia azaldu ere egin PSEren eta Aralarren kritikak. Honela jasotzen zuten berria DNA-k, Berria-k eta Gara-k.