Mathiasen kopilotua

Futbolitisa inoiz baino baxuagoa daukadan arren (medikuak esan dit lasai egoteko; ez dela ezer larririk), tradizioari eutsi eta Zilarrezko Meloiaren hirugarren ekitaldia deitzera noa. Joan zen denboraldian ere pakete ugari sufritu behar izan genuen ustezko Izarren Ligan eta bestelako konstelazioetan, Premier Leaguen edo Calcion esaterako. Zoritxarrez, aurtengo Zilarrezko Meloia eskuratzeko faboritoen artean kandidatu ugari ditugu etxetik hurbil: Reala bigarren mailara eraman zuen talde osoa adibidez. Horiekin batera, sekulako ikusmina piztu eta zaleen itxaropenak zapuztu dituzten beste jokalari asko: Cassano (nire faboritoa), Emerson, Cannavaro (Urrezko Baloia iaz), Raul (Urrezko Baloia eskuratzeko zerrendan), Del Horno, Shevchenko, Ballack, Mark Gonzalez (kasu misteriotsua benetan: Realean egindakoaren ostean, zelan ez zuen Liverpoolen arrakastarik izan?), Torres (Liverpoolera alde egin behar izan du Atletico de Madrid goraka hasteko), Maxi Lopez, Fiore, Hugo Viana, Petrov, Costinha…, eta zuen kromo kuttunetan egongo diren beste asko.

Aurreko bi edizioetan (one eta two) ez ditut boto gehiegi jaso. Badakit Goienako blogetan erantzun bat uztea Opticas Zinkunegiko proba bat gainditzea baino zailagoa dela. Edozelan ere, parte hartzea suspertze aldera, Raulek eta Torresek Urrezko Baloirako jasotzen dituzten botoak baino gehiago lortzen baditu irabazleak, hitza ematen dut Zilarrezko Meloia emango diodala, Euskal Herriko futbol zelairen batera etortzen bada behintzat. Boto emaileen artean partidurako sarrera bat zozketatuko dut eta hara joango gara biok Zilarrezko Meloiarekin. Babesle bila nabil eta badaukat ideia bat edo beste…