Mathiasen kopilotua

Ostegunean film guztiz gomendagarri bat ikusi nuen Arrasaten: Una verdad incómoda.

Aldaketa klimatikoaren ondorio beldurgarriez ohartarazten digu Al Gorek. George Bush juniorrek 2000ko hauteskundeak irabazi (¿) zituenean, demokraten hautagaia zen Al Gore; filmean tele-predikari baten itxura dauka baina sinesgarri agertzen da. Ebidentzia kezkagarriekin batera, bere ibilbide politikoko eta familiako kontuak tartekatzen ditu Al Gorek; hauteskunde haiek galtzea kolpe gogorra izan zela aitortzen du. Ironiarako tartea ere badago: "AEBko etorkizuneko presidentea nintzen garai baten", esanez aurkezten du bere burua jendaurrean. Modu didaktikoan, grafiko eta irudi ikusgarriez lagunduta, etorkizun beltza iragartzen du Gorek. Una verdad incómoda beldurrezko thrillerra dela esango nuke.

Klima aldaketarena egi desatsegina omen da zenbait agintarirentzat, hortik filmaren izenburua. Canneseko Zinema Jaialdian aurkeztu zuten, baina gure artean behintzat, tamalez, ez da film ikusienen zerrendara iritsi. Guztion onerako eta kontzientziaziorako interesgarria litzateke filmak ahalik eta zabalkunderik handiena izatea. Oraindik egoera zuzentzeko garaian omen gaude.

PS (2). Arrasateko Amaia Udal Antzokia primeran dago. Hala ere, ateei malgukiak jartzea ez legoke gaizki. Berandu iristen direnen danbatekoak entzutea gogaikarria da benetan. Una puerta incómoda.