Mathiasen kopilotua

Jakinekoa da futboleko presidenteen eta telebista kateetako arduradunen bertuterik handiena ez dela pazientzia. Telebistaren kasuan gertatu izan da telesaila, reality edo lehiaketa jakin bateko promozioak saioak berak baino iraupen handiagoa izatea. Zenbaitetan udan hasten dira promozioarekin eta udazkenean emisioa hasi orduko, audientziak aginduta, berehala jausten dira saioak programaziotik, hostoak bailiran.

Pelotas eta Doctor Mateo telesailekin tabarra ona eman dute aurreko hilabeteetan. Hain erritmo geldoa, gatz bariko elkarrizketak eta egoera absurdoak dituen Doctor Mateo telesailari ez diot bizi-itxaropen luzea ikusten. Beste horrenbeste esan daiteke Cruz eta Corbachoren Pelotas futbol-telesailaz. Asteleheneko kapitulua, korear baten fitxaketaren kontura, negargarria izan zen, gauza larria ustezko umorezko telesail baten kasuan. Julio Salinasen agerpenak eta iraupen luzeak (ordu eta erdi pasatxo!) ere ez zioten mesederik egin telesailari. Mailari, parrillari, eutsiko al dio La Union taldeak?

(Telebegi, Goienkaria)