Realaren mendeurrenaren harira, gaur eguerdian, Herri Irratian, Atotxako beraien lehen oroitzapenari buruz jardun dute Iban Oiarzabalek, Joseba
Urdangarinek eta Iñigo Chaurreauk. Tio Jesus zenak (dagoen lekutik sufrituko
du bai, gaurko Realarekin) eraman ninduen lehen aldiz Atotxara, 1979ko
urtarrilean, hamar urte nituela. Gabonak ziren eta horixe izan da inoiz jaso
dudan oparirik onenetakoa. Ordura arte, irrati bidez Josean Alkortak egiten
zituen erretransmisioei esker irudikatzen nuen Atotxa, eta sorpresa galanta
izan zen, begiak zabal-zabalik, lehen aldiz hura ikustea. Futbol zelaiko berde
zoragarri hura, harmailak, puro usaina (tiorena tartean), horrenbeste jende harmailetan, bufanda eta bandera
txuri-urdinak (non geratu dira?)… Realak 2-0 irabazi zion Bartzelonari egun hartan, eta bi golak Lopez
Ufartek sartu zituen, falta bidez. Hura zen gainera nire idoloa.
Atotxako estreinaldia ezin hobea gertatu zen nire kasuan.
Horixe Atotxako nire lehen oroitzapena. Eta zurea?
2009/09/08 16:05:03.927 GMT+2
Atotxako lehen oroitzapena
Nork: edu mendibil.2009/09/08 16:05:03.927 GMT+2
Etiketak:
iñigochaurreau
lopezufarte
joseanalkorta
atotxa
herri-irratia
ibanoiarzabal
zuburrutibaserria
realsociedad
josebaurdangarin
| Permalink
| Erantzunak (1)
| Errenferentziak: (0)
Erantzunak
Bi gauza gogoan dauzkat beste ezeren gainetik: batetik, Lopez Ufartek zela eskatzen zion Arkonadari baloia, txistu eginez, ezkerreko hegalean, hertzean, marra zuriaren ondoan. Eta, bestetik, zuriekin jokatzen zuen beltza: Cunningham. Madrilen fitxaketa izarra zen, baina ez zuen ezer egin gure Gajate, Kortabarria, Zelaieta, Olaizola eta abarren aurrean.
Madrilen aldetik jokatu zuten Juaninok, Santillanak, Stielikek, Pirrik, Camachok, Del Bosquek..., baina, halere, izar horien guztien gainetik pasatu ziren txuri-urdinak. Ametsa egi bihurtu zen... Realaren hamaikakoa? denok buruan daukagun hori, buruz ikasi genuena: Arkonada, Zelaieta, Gajate, Kortabarria, Olaizola, Diego, Alonso, Zamora, Idigoras, Satrustegi eta Lopez Ufarte.
Koinatuak eta haren Mutrikuko lagunek eroan ninduten partidura eta nire lagun Kuxin ere etorri zen.
Ezetz asmatu zein zen Madrilekoen entrenatzailea? "Futbol es futbol" zioen hura: Vujadin Boskov. Seguru horixe errepikatu zuela partiduaren ostean kazetari madrildarren aurrean.
Historikoa benetan!
Nork: Eneko Azkarate.2009/09/09 09:22:49.711 GMT+2