Mathiasen kopilotua

Iritsi da futbol denboraldiko onenak eta txarrenak aukeratzeko ordua. Aurten, Urrezko Baloiaren izendapenak sekula baino zeresan handiagoa eman du, besteak beste, sufritzea tokatzen zaizkigun kirol aldizkarien erruz: Casillas guapoena dela, Torresi trajeak bikain geratzen zaizkiola, Messiren benetako sekretua orrazkera dela… En fin.

Txoko honetan nahiago dugu han eta hemen, euren taldeetako futbol zaleak sutan jarri dituzten ustezko crack horiek saritzea. Horra hor IV. Zilarrezko Meloia eskuratzeko merituak egin dituzten izarretako batzuk: Shevchenko, Ronaldinho (azkenean natillen maldizioak jota bukatu zuen Ronnie sinpatikoak), Del Horno, Banega, Hildebrand, Saviola (Barcaren aulkitik Madrilen aulkira), Thierry Henry (Urrezko Baloitik Zilarrezko Meloira?), Metzelder (missing baita), Helguera, Urzaiz (halako jokalari handi batek nola izan zuen hain amaiera tristea Ajaxen?), Motta, Robben (ona bai, baina Luis Perez baino sarriago lesionatzen dena), Drenthe, Gago, Edmilson, Dudek (Casillasekin jai dauka), Soldado (Iruñean golak egiten zituen behinik behin), Ayala, Maxi Lopez, Ricardo Betiseko atezaina, Lehmann Arsenalgoa, Reyes…

Zerrendarako hautagai gehiago burutzen zaizkizula? Aurrera sukalderaino, beldur barik. Barra libre.

Aurtengo Zilarrezko Meloia emateko badut babeslea. France Footballeko lagunei ere gonbidapena pasako diet; ea sari banaketa ekitaldira etortzen animatzen diren.