Mathiasen kopilotua

Ez dut inoiz bere jatetxean bazkaldu, baina ia egunero bazkaltzen dut Karlos Argiñanorekin. Egiten duen saioa benetan ona iruditzen zait eta Argiñano bera, komunikatzaile aparta. Telebistari dagokionez, bazkalostea alaitzeko Los Simpsons edo "Argiñanoren programa":http://www.karlosnet.com/Programa2005/entrada.php aukeratzea izaten da onena. Esperientzia luzea dauka Argiñanok telebistan. Aurreko denboraldian TVEn jardun ondoren, zeresan ugari eman zuen sukaldariak Telecincora alde egiteak. Iban Zubiaurreren fitxaketan baino milioi gehiago izango ziren jokoan, ziur egon.

Bere ohiko errezetari eutsi dio aurtengo denboraldian: edozeinek gertatzeko moduko platerak, errealizazio bikaina, sukaldariaren jardun grazioso eta martxosoa, Euskal Herriko zein Espainiako txoko eta produktuen goraipamena, bere emazte santuaren goraipamena, txaskarrilloren bat edo beste, Eva ahizparen eta Juan Mari Arzaken bisitak, bere ohiko hizkera (cogollito, salsita, pimientito…) eta hainbat produkturen babesa. Publizitateak agintzen du telebistan, nola ez. Edozein modutan, nire ustez sukaldaritzako programarik onena da *Karlos Arguiñano en tu cocina*. TVE-1ean Jose Andres asturiarra jarri zuten, baina nik Argiñanorekin jarraitzen dut. Argiñanoren aldean, fundamentu gutxi dauka Jose Andresek. Narrasagoa da.

Udako denboraldia dela eta, jatetxearen kanpoaldera atera da Argiñano, eta Getariako arratoia eta Zarauzko hondartza atzean dituela grabatzen dute programa, orain dela urte dezente egin zuten moduan. Ohiko kortinillen ordez, plaian grabatutako irudiak ikus daitezke egunotan: emakumeak pasiuan itsas ertzean, surflariak olatuekin jolasean, gizonen bat periodikua irakurtzen… Oraingoz ez da nudistarik ikusten pantailan.

Lainorik ere ez da apenas ikusten. Antza denez, uda perfektua bizi dute Zarautzen. Argiñanok saltzen dizkigun irudiei kasu egitea baino, hobe eguraldiaren berri barraren atzetik izatea, porsiakaso.

Ohikoa duenez, askotan txiste batekin amaitzen du Argiñanok bere programa. Gaurko programan zera bota du:

- Ya sabeis como se dice olla-express en euskara?

- Gisasola. Guisa sola.

Enpin.