Erramu zapatuko DJ festa aztertzen

2010/03/29 22:11:20.471 GMT+2

Erramu zapatuko DJ festa aztertzen

Pasa den larunbatean, Bergaran, erramu zapatua ospatu genuen. Goizean feria eta gabean azken urteetan esponentzialki hasten doan festa.

Ekimen berri eta ezohiko bat ere izan zen, zabalotegi aretoan 12-14 urteko gazteendako disko jartzaile bat jarri zuen udaletxeak. Ideia interesgarria eta berritzailea iruditu zitzaidan. Adin horretako jendearendako gauza gutxi daude eta ondo akordatzen naiz, orain dela urte batzuk, galduta ibiltzen ginela egitarauan guretako zerbait bilatzen.

Arazoa edo nire kezka ordea, DJak zer musika mota jarriko zuen zen. Makurtuta bertaratzea ere pentsatu nuen SGAEko estupa baten antzera, baina normala den bezala ez nintzen atrebitu.

Gaur goiena.net-en festaren irudi batzuk jarri dituzte eta bertan susmatzen nuena baieztatzen da. Patxanga festa izan zen.

Aspertuta nago egoera musikal honekin, larunbatetan musikaz kexatzen naizenean, gehiengoak Lady gaga, parrapapa edo reggaetona gustatzen zaiola argudiatzen didate lagunek eta beste musika estiloak ez direla festarako esaten didate.

Galdera betikoa da, gehiengoari patxanga gustatzen zaiolako jartzen da patxanga? edo patxanga jartzen delako gustatzen zaio gehiengoari musika estilo hori? Rock, folk, punk, jazz, pop, hardcore, heavy, thrash, rap, techno edo beste mila etiketatako kanta dantzagarri asko daude eta 40 principales edo gazteak-en anplifikadore izatea ez da aukera bakarra.

12-14 urtetako gazte guztiei parrapapa festa bat antolatzen badiegu, musikazaleen harrobiak hartuko duen norabidea argia izango da. Beharrak sortu egiten ditugu.

Teknologia berriek imajinatu ere ezin dugun musika kantitate eta barietatea eskaintzen diguten bitartean, horrelako ekimenek, artaldea 4 hit-ekin asearazten dute eta hori ez da batere aberasgarria.

Urte gutxi barru, gazte horiek batxilergora joango dira eta bertan, alternatiba musikalak aurkituko dituzte, ardi beltz ugarik utziko du artaldea baina beste askorentzako berandu izango da.

Eskerrak, txosna, gaztetxe eta taberna alternatiboak ditugula, fast food musikatik aldendu eta gauak kulturizatzen dituztenak.

Ekimenak izugarrizko arrakasta izan zuen eta errepikatu egingo dela erabaki da. Ea hurrengoan aniztasun handiagoa eskaintzen duten, horrelako zerbait ez zen gaizki egongo.

Amaitzeko, Berri txarrak-en SMT (Shitty Music Tavern) kantarekin uzten zaituztet.

Zenbat pijada entzun behar diren
gure inguruko tabernetan
telebistako kateak bailiren
horteroen lehiaketak

Aspertuta gaude
egoerarekin
rock falta honekin

Eta iragarki komertzialek
markatzen badizuete ildoa
esango hemengo taldeek
zertan dute ba geroa

Nazkatuta

Are gehiago esango nuke
eta ez gaizki hartu
hemen rocka hasi zenetik
hogei urte pasa badira
esaidazue zergatik jaialdietan
beti berdina entzuten da
ez al gaude eszenaren alde?

Barkatu ez bazaizu gustatzen
baina jotzera goaz
inoiz baino altu eta ozenago
eta zikinago

Nazkatuta

Nork: Demonocrazy.2010/03/29 22:11:20.471 GMT+2
Etiketak: zabalotegi musika dj bergara | Permalink | Erantzunak (9) | Errenferentziak: (0)

Erantzunak

Nik ez ditut ba hain argi gauzak. Zuk diozun fast food musika hori beti egon da (1950etik aurrera edo, esan dezagun), edo izen hori merezi ez bazuen ere, beti egon da musika bat telebistan, irratian, tabernetan txanpona sartu eta kantu bat entzun ahal izateko makinetan...beti egon da musika komertziala eta undergrounda.

Baina zuk beste bereizketa bat egiten duzu, zeren bai baitakit Metallica ez duzula fast food sailean sartzen (nik ere ez). Baina ez nuke esango talde hori musika alternatibo denik ere.

Gustu kontuetan, geroz eta argiago dut gustuak ez direla geure baitakoak, askotan zerbait ez gustatuagatik ere, geure burua konbentzitzen dugu "hau gustatu behar zaik, kauen" mila bider esanda. Kuadrilako batek dio zerbeza ederra dagoela, baina zuri ez zitzaizun gustatu. Hala ere, nola esango duzu hori, nola esango duzu etzaizula zerbeza gustatzen...hemen zerbeza gustatzea legea da. Beraz, edaten jarraitu zenuen, gustatzen zitzaizula esanez....eta halako batean, 100. tragoan edo, gustatu zitzaizun.

Zergatik Arrasaten punk/oi! musikak du hainbeste arrakasta, eta zergatik Lasarten heavy-metalak, eta zergatik Bergaran musika-aditu izatea dago modan? (jaja)

Ba herri horietako bakoitzean, noizbait norbaitek (lider lokalen batek) esan zuelako punk/oi-a/heavya/aditu izatea bikaina duk, motel. Eta beste guztiek ardiak bezala jarraitu zioten. Eta onena da, guztiok uste dugula pribilegiatu batzuk garela entzuten dugun musika entzuteagatik, eta besteek, gizajo horiek, ez dutela ideiarik.

Sinzeridadez: mundu guztiak Anari entzungo balu, nik ez nuke etzungo, seguruenik.

Nork: ostolaza.2010/03/30 11:42:15.389 GMT+2
http://ostolaza.mundua.com/

Ados esaten duzunarekin eta argi dago gaztetan usakoko presatik salto egiten baduzu lagunen artean ondo geratzeko dela. Musika guztiz subjektiboa da, bai, bale arrazoia, baina orain politikoki zuzen izateari utzi eta onartu, guztia subjektiboa izanda ere 4 hit-ekin konformatzen denak musikaz gutxiago dakiela.

Estereotipo asko daude, punkia, oizalea, heavy-a, poperoa, rockeroa, mod-a (moda...) eta gehienetan koadrilaka banatzen ziren lehen, orain ordea moda bakarra, bergaran behintzat, patxanga da. Ez dago aipatutako estereotipoen kuadrillarik.

Gustuendako koloreak, ados, baina zuria eta beltza batzuk ez dituzte kolore bezala kontsideratzen eta gazteak-en jartzen dutena bakarrik jaten duenak beltza aukeratu du.

Gustatu zait 'musikan aditua' aizkorakada, baina askotan harrotasunez idazten badut ere, benetan musikalki analfabeto kontsideratzen naiz. Musika itsaso handi bat da eta ez dut ur baso bat ere ez kontrolatzen. Gauza da, itsuen munduan begibakarra erregea dela eta horrela ikusten naiz parrapapa jendearen aurrean.

Azken urteetan Anari oso ezaguna egin da, talde fetixista aldatu beharko duzu jendearen aurrean cool gelditzeko...

Nork: Demonocrazy.2010/03/30 13:29:52.947 GMT+2
www.goiena.net/blogak/demonocrazy

jaja, hasiko naiz ba zerbait berria pentsatzen...
arrazoi ematen dizut e, nik ere noski uste dudala batzuek ideiarik ez dutela. Azken batean, norberak erabakitzen du bizitza honetan zertan sakondu (edo ez sakondu), eta batzuek musika aukeratzen dute, besteek beste hobbyren bat duten bitartean. Hori bai, nahiz eta gaur egun modan belarritik erraz sartzen (eta ateratzen) diren doinu patxangeroak daude, beste esparru batzuetan ere gauza bera gertatzen dela iruditzen zait: heavy bat izan daiteke patxangero bat bezain ezjakina. Bakoitzak inguruan entzun duena aukeratu du.
"Gaztea"k ez du deus balio, baina EHko gazteriaren (eta gazte sentitzen direnen) zati handi batek entzuten du, gustura. Ba entzun dezatela, ni ez naute molestatzen. Musika entzutea behintzat zerbait indibiduala da eta nik neure doinuak eskura ditudan bitartean, zoriontsu izaten jarraituko dut.

Nork: ostolaza.2010/03/30 15:26:41.511 GMT+2
http://ostolaza.mundua.com

PD: abesti horretatik orain arte, Berri Txarrakek asko hobeto du letrak egiteko orduan...jaja

Nork: ostolaza.2010/03/30 15:33:59.900 GMT+2
http://ostolaza.mundua.com

Ba neri gazteak-ek bai molestatzen dit ze irrati publiko bat da. Norbaitek kantu bakar batekin bizitzea nahi badu, berak ikusiko du zer egiten duen, irrati edo ekimen publiko batek ordea, kultura kontzientziazioa eduki behar duela uste dut eta horregatik idatzi dut sarrera hau. Etxe barruan bakoitzak nahi duena egiteko, baina udalak antolatutako ekimen batetan hau ikustea ezin dut onartu. PS: Bai, Urbizu jaunak gero eta letra hobeak eta sakonagoak idazten ditu.

Nork: Demonocrazy.2010/03/30 15:44:51.337 GMT+2
www.goiena.net/blogak/demonocrazy

Bueno, hemen helduak ari zarete hizketan eta beldurra ematen du aportazioren bat egiteak, baina bueno, nere kontribuzioa egiten ausartuko naiz.
Garbi dago norberak ezin duela inguruko korroneteetatik at geratu, nik gazteagotan 40 pricipales ikusten nuen eta gaur egun nere lagun batek esaten didan bezala, lau frikik foroetan komentatzen duten musika entzuten dut. Eta guayarena egiteko pelikulak ikusten ditut. Baina kuestioa da beti izan dudala haratago joateko grin hori edo, zure iturri bakarra gaztea bada ba horra jo beharko dezu musika bila... eta bertan gehiengoa letra lelodun abesti sinpleak badira, geroz eta jende gehiago izango da "artaldekoa" (ze koolak garen) eta aberastasuna galtzen da.

Portzierto, musikaz nahi duguna baina historiaz, poesiaz edo nik zer dakit zerri buruz putaidearik ez daukat ideia handirik eta egongo da norbait iritzi berdina izango duena bere hobbyaren ikuspegitik...

Nork: tellychavalas.2010/03/31 21:52:59.150 GMT+2
testicularsoundexpress.wordress.com

Ez dakit hau off-topic izango den edo ez, baina esan beharra neukan: oraindik ez dut entzun euskaraz (eta ez beste inolako hizkuntzetan ere) Berri Txarraken "Zirkua" abestia baino letra hoberik. Nire gusturako, behintzat.

Ondo izan.

Nork: Euskaldun.2010/04/15 17:31:10.918 GMT+2

oraindik pentsatzen jarraitzet. hitzeingodeu, hitzeingodeu... buseko biajek askotako emateue ta.

Nork: olatzartola.2010/04/26 00:53:03.363 GMT+2
hitzsetatuak.wordpress.com

nik ustet oi beti gertatuala, beti eondala modan zerbait ta oi modan eondala saldu induelako. halare bakoitzak bere gustok ditu, ta eongoa norbait musika oi gustatze ziaona ta eongoa gustatze etzaionare. oi gusto kontua da...ezta?

halare, parranda jutegeanen patxanga bai da musika entzunetako bat baña alataguztiz badaude beste hainbat taberna zeinak eztuen patxanga jartzen. nei, tekno etzait gustatzen adibidez ta alare jendeak parranda alakokin botatzea gustukou. nei patxanga gustatzezait, baña segun ze abesti ta ze mota...

hala ta guztiz pentxatzet jendeak entzuteuna bai dala oi bakarrik entzundulako. osea, bea eztalako jarri bilatzen i demas, modan daona entzutea geiena ta beak oi bakarrik entzundulako. osea asuntoa nik ustet bitakoa dala: jendeak patxanga gustatzezaiolako entzuteu ta entzuteulako gustatze zaio.
baña oi nik ustet gauza guztikin gertatzeala...

Nork: olatz artola.2010/04/28 17:01:19.342 GMT+2
hitzsetatuak.wordpress.com