Bagara

Bagarako Iraunkortasuneko Sustapen Taldeak, Iraunkortasuneko hezkuntzaldia: ekintzarako gaituz izeneko tailerra antolatu du ekainaren 18an Aretxabaletan. Iraunkortasuna ardatz gisa hartuta, komunitate bezala ditugun erronka eta aukerak aztertu eta hausnartzea da zortzi orduko tailer honen helburua. Oso modu dinamiko eta irekian lantzen dira gaiak, talde txikian eta partaide guztien parte hartzerekin: petrolioaren gailurra, aldaketa klimatikoa, herritarron ekimenen beharra, trantsizio eredua eta ikuspegiaren lanketa, etab. Mintegi interesgarri eta gomendagarria benetan.

                                          

Egitaraua:

9.30etan: Taldearen, ekimenaren eta eguneko gaien aurkezpena

9.45 Trantsizio ereduaren nondik norakoak

11.20 Trantsizioa nola gauzatzen den

16.00 Espazio irekia: taldeko proposamenak

17.30 Ondorioak eta amaiera

Transition mugimendua eta hezkuntzaldiaren inguruko informazioa ondorengo estekan duzu. Transition

Tailerra dohainik izango da eta adin guztietako pertsonentzako dago zabalik. Izena ematea zabalik dago eta 943796848 telefonora deituta edo bagara@bagara.net helbidera idatzita egin daiteke.

 

Ikasturtea amaitzear dagoen honetan, Bagara Sortzen elkarteko kideok, azken urte t´erdi honetako ibilbidearen nondik norakoak azaltzeko batzar informatziboa antolatu genuen Eskoriatzako Ibarraundi Museoan. Sustapen taldeetako zein Noraguneko kideak, Herrigintza Gaztean parte hartu duenak, Huhezi, Lanki eta Arizmendiko langileak, LKS aholkulari taldeko kideak, eta beste hainbeste lagun elkartu ginen bertan.  Bagararen ibilbideaz, sustapen taldeek egindako lanaz, egondako aldaketez eta etorkizuneko erronkez jardun ginen, mokautxo baten inguruko berrikeltadi eta etxetik ekarritako oparien elkar-trukearekin amaitu zen batzarrean.

argazkiak

 

Pozik itzuli dira Herrigintza Gazteako kideak Euskadiko Gazteria Kontseiluak Gasteizko Udalarekin batera antolatutako Gazteria Politikak aztertzeko 6. forotik. Goizteko 10etan ekin diote Simone de Beauvoir kultur etxean gazteria teknikari, kontseilu kide, gazteria arloan lan egiten duten elkarteetako arduradun eta oro har gazteek hausnarketarako eta esperientziak partekatzeko ekimenari. Goiz interesgarria izan da: hasteko, Pep Montes, Gazteria arloan aditua eta Consell de la Cultura y les Arts erakundearen zuzendaritzako kideak, sareak egitearen garrantziaren inguruan ekarpen teorikoa egin du. Ostean, Herrigintza Gaztea ekimeneko Ion eta Aitzolek, Bagararen inguruko azalpen laburra eta honen baitan gazteen ekimena nola kokatzen den azaldu dute. Kafearen ostean etorri da arlo teoriko zein praktikoaz jarduteko ordua, ekarpen hauen aplikagarritasunaz eztabaidatu baitute taldeka bertara gerturatuko guztiek.

Arratsaldeko 18.00etan egingo da egun osoko jardunaldiaren ebaluazioa. Gure partetik behintzat, eskertzekoa da benetan Herrigintza Gaztea horrelako ekimen batera gonbidatu izana. Espero dugu foroan parte hartu duten kideentzat ere interesgarria izan dela.

Gaztelink

Arrasate Irratiko "Igo Autobusera!" saioan, Iraitz Agirre Bagarakideari egindako elkarrizketa biharko hezkuntzaldiaren inguruan.

/goiena.net/albisteak/iraitz-agirre-biharko-jardunaldira-ingurumenaz-eta-iraunkortasunaz-kezka-duten-guztiak-gonbidatu-gur-ditugu/

Iraunkortasuneko hezkuntzaldian izena emateko aukera dago oraindik. Larunbat honetan izango da, Arrasateko Etxaluze egoitzan, goizeko 9.30etan hasita. TRANSITION eredua ezagutzeko aukera paregabea da honakoa, oso modu dinamikoan eta parte hartzailean gainera.

Izena emateko, deitu 943796848 telefonora edo idatzi email bat bagara@bagara.net helbide elektronikora.

Hekuntzaldiaren izenak dioen bezala, ekintzara bideratutako formazioa da honakoa eta zortzi orduko mintegi dinamikoa izango da, transition ereduan oinarrituta egongo delarik. Talde-lanean, pertsona bakoitzaren sentsazio eta bizipenak ezagutuz, gure herrien egoeraren inguruko kezkak azaleratu eta gure ohituretatik abiatuta, iraunkortasunaren alorrean jendarte bezala ditugun erronkak identifikatu eta herritar bezala ditugun aukerak aztertzen saiatuko gara.

 

Debagoieneko eragile eta banako bezala, gai honen inguruan hausnartu eta iraunkortasunaren ildotik ekimen ezberdinetarako elkarguneak sortzea ezinbestekoa dela deritzogu. Horregatik apirilaren 2an Arrasateko Etxaluze egoitzan burutuko den hezkuntzaldian parte hartzera gonbidatu gura zaitugu.

EGITARAUA:

 

9.30: Taldearen, ekimenaren eta egitarauaren aurkezpena

9.45: Trantsizioaren nondik norakoak

11.00: Atsedenaldia

11.20: Trantsizioa nola gauzatu

13.00: Bazkaria

16.00: Espazio irekia: taldeko proposamenak

17.30: Ondorioak eta amaiera

Izena emateko idatzi email bat bagara@bagara.net helbidera, edo deitu telefonoz 943796848 telefonora.



Esteka interesgarriak
Arrasaten burututako 1. Hezkuntzaldiaren kronika
Transition Towns: eraldaketarako bide bat artikulua
Transition ereduaren aurkezpena
Espazio irekia metodoa
In Transition dokumentalaren lehen zatia
Pueblos en transición, TVEko "Escarabajo verde" saioan

Herrigintza Gaztearen nondik norakoak azaldu dituzte Aitzol Loyola eta Ion Etxebarria egitasmoko kideak Arrasateko Mondraberri atarian. Bertan jasotakoa jarraian:

Zer da Herrigintza Gaztea?

Herrigintza Gaztea, Bagara egitasmotik sortutako proiektua da, gizarte eta kultur gai ezberdinen inguruan formazioa garatzeko gunea.  Herrigintzara bideratutako edukiak landu, eta Debagoieneko herri ezberdinetako gazteekin elkargunea partekatzen dugu. Testuinguru honetan, esperientzia ezberdinak ezagutu eta testigantza ezberdinen bidez bailarako gazteengan eragina duten gaiak jorratu gura ditugu. Bagarako lau “oinarri eta iparrekin” (euskalduntasuna, iraunkortasuna, auto-eraketa eta elkartasuna) bat datozen gaiak lantzea da helburua, aurrera begirako proiektuak gauzatu ahal izateko.
 
Nola sortu zen ekimen hau?

Bagara egitasmoaren baitan, sustapen talde ezberdinak jarri ziren martxan duela urte bete inguru, eta euretako bat “gazteen sustapen taldea” zen. Bailarako gazte ezberdinak elkartuko zituen formazio gune bat sortzea izan zen lan-talde honen hautua, herrigintzan aritzeko baliagarria izan daitekeen formazio gune bat sortzea, alegia.

Zeintzuk dira helburu nagusiak? Eta zeintzuk baliabideak?

Lehen esan bezala, Herrigintza Gaztearen helburu nagusienetakoa bailarako gazteekin herrigintzarako prestatzeko gune bat sortzea da. Egungo munduko klabeak ulertu, ditugun desafioak aztertu, eta herrigintza nola egin hausnartzea da helburua. Horretarako esperientzia ezberdinak ezagutuko ditugu, gai batzuetan adituak diren pertsonak ere etorriko dira, eta herri mugimenduetan aritutako pertsonen testigantzak ere izango dira. Bestetik, bailarako herri ezberdinetako gazteez osatutako taldea sortzea ere badago helburuen artean, horrek potentzial handia izango baitu aurrera begira.  Egitasmo honek ekainera arte formazioa landu nahi du, baina dinamika hau urtetik urtera errepikatzea nahiko genuke, batez ere gazteek halaxe nahi badute, eta eurak ere antzerako dinamika bat antolatzeko prest agertzen badira.

Zenbat pertsona zabiltzate arlo honetan lanean?

Proiektua gorpuzteko prozesuan fase ezberdinak egon dira, eta bakoitzean jende ezberdinak hartu du parte. Bost pertsona hasi ziren hasiera batean, duela urtebete, baina lan-talde hori aldatuz joan da. Gaur egun lau pertsona gaude Herrigintza Gaztean bueltaka lanean. Bestalde, 25 gazte inguru elkartu gara orain arteko saioetan. Talde trinko bat osatzea da helburua, baina saioak irekiak dira eta gura genuke jende gehiagok ere parte hartzea.


Zein da herrigintzaren egoera une honetan gazteen artean?

Herrigintza bezala zer ulertzen da? Hor dago gakoa. Gazteriaz hitz egiten denean, gizarte honen beste sektore bat direla ahazten zaigu. Ideologia gabezia eta gizarte zein gai politikoekiko desinteresa  leporatzen zaie gazteei, baina herri mugimenduetan gazte askok hartzen du parte. Hau da, esparru ezberdinetan esperientzia eraldatzaileak aurrera eramateko grina erakusten duen gazte multzo zabala dago. Beharbada dagoen indar hori sakabanatuta dago, eta beharbada ez da lehengo gai berdinetan azaleratzen, baina horrek ez du esan nahi gazteen partetik herrigintzarako grinarik ez dagoenik.

Etorkizunera begira baikorrak izateko arrazoiak baditugu? 

Badago ezkor izateko arrazoirik, baina gugan eta ingurukoengan sinesteko ere ez zaizkigu arrazoiak falta! Gauza txikiak eraldatzeko baikortasuna badugu, eta gauza handiak aldatu daitezkeela sinestea ere ez da hain zaila. Inguratzen gaituenari begirada kritikoaz begiratzen diogu, eta alternatibak bultzatu eta sortu nahi ditugu. Epe luzera begira, pixkanaka-pixkanaka joan behar gara.

Egungo eredu kapitalistak ba al du eraginik gazteen herrigintza ereduan? 

Noski baietz.  Gizarte eredu honetan balore eta bizi estilo batzuk sustatzen dira, beste batzuen kaltetan. Komunikabideek, iragarkiek, merkatuak … bizitza estilo bat bultzatzen dute, gero eta indibidualistago, kontsumistaagoa eta pasiboagoa dena.  Gazteok bestelako bizimodu batekin amets egiteko arrazoi ugari ditugu: etxebizitza arazoa, lan baldintzak, egoera ekologikoa, gizarte konpetentzia… Bestelako gizarte batetara hurbiltzen gaituzten dinamikak sortzea izan da herrigintzak historikoki garatu duen lana. Herritarren parte hartzean oinarrituz, alternatiba berriak sortzea, alegia. Gizarte kapitalistan dauden botere nagusiek dinamika eraldatzaile hauek akabatu nahi izaten dute, ez dute begi onez ikusten herrigintza aktibo eta eraldatzailea. Bide horretan, dinamika eraginkorrak garatzea da esku artean dugun erronka polita.

Non lortu daiteke proiektuaren informazioa?

Informazioa Herrigintza Gaztearen blogean dago eskuragai.  Bailarako gazteak proiektua ikusi eta parte hartzera animatu nahi ditugu, pena merezi du eta.

Mondraberri: Arrasateko ataria

Arrasateko Emakume Txokoan elkartu ginen gazteok bigarren saio honetarako eta bertako teknikaria den Estherrek, gunearen berri eman zigun: nondik nora sortu zen, ze ekimen mota antolatzen dituzten, etab.

Ostean, Urtzi Ugalde eta Ibai Iriarte, Euskadiko Gazteriaren Kontseiluko kideekin egungo errealitatearen azterketa kritikoarekin hasteko ariketa bat burutu genuen, “egun baten kronograma” osatzetik hasi zena. Bertan, esnatzen garenetik loak hartzen gaituenera arte egin edo sentitzen ditugun kontraesanak idazteko eskatu ziguten: iratzargailua, kotxea hartzea, lanera joatea, lankideen aurpegi ilunak, gurasoekin eztabaidak, kontsumoa, alokairua ordaintzea eta bestelako hamaika gauza irten ziren eta denak, taldeka, ondorengo mapan jartzeko eskatu ziguten, mintzagai izan genituen gaiak alegia.

Gai asko jorratu ziren saioan zehar, baina pare bat aipatzearren, aisialdiaren baitan, behin eta berriro irten zen komunikazio eta komunikabideen gaia. Besteak beste, identitatea eta jokamoldeen osaketan duten eragina dela-eta, bai eta ‘errealitatea’ren gure ulerkera osatzeko duten gaitasunagatik ere, komunikabideek paper garrantzitsua jokatzen dute herrigintzan eta gazteon errealitatean. Hortaz, komunikabide nagusien aurrean jarrera aktibo eta kritikoa garatzea, bai eta komunikatzeko bide propioak eraikitzea ere, ezinbestekoa da herri-proiektu integrala garatu ahal izateko. Hezkuntzaren gaia landu genuen, hezkuntza ez-formalaren garrantzia azpimarratu zelarik. Lanaren pisuaz ere jardun ginen eta honek egunerokotasunean zenbat baldintzatzen gaituen.  Etxebizitzaren arazoa, sistema zoroaren barruan sartuta egotea, kontsumo basatia, auzolanaren garrantzia, etab. Azken batean, amets pertsonalek eta arau sozialek talka nola egiten duten argi geratu zen beste behin. Hiru ordutan gai mordoaz aritu ginen hizketan, bai horixe!

Bukatzeko, Herrigintza Gazteako kideok etxerako lan batekin joan ginen etxera: ereitea baino garrantzitsuagoa zaintzea delakoan, loretxo bat oparitu ziguten. Herrigintza Gazteak iraun artean, ea zenbatek handi egitea lortzen duten!

Gaur, urtarrilaren 26an, asteazkena, Arrasateko Emakume Txokoan, arratsaldeko 18.30etatik aurrera.

Orain dela bi aste ekin genion Herrigintza Gaztea egitasmoari. Lehenengo saioan Bagara azaldu, Herrigintza Gaztea nondik nora joango den deskribatu eta lan-taldeko kideak elkar-ezagutzeko helburuaz egin bazen ere, aste honetan, gazteen errealitatearen inguruko saioa antolatu da Herrigintza Gazteako taldekideentzat “Egungo errealitatearen azterketa kritikoa” izenburupean. Horretarako, Euskadiko Gazteriaren Kontseiluko kideak etorriko dira eta gai ezberdinak jorratuko dira, bai hitzaldi gisan, baina batez ere eztabaida eta iritzi-trukaketa formatuan. Ondorengoak dira saioan landuko diren gai nagusiak:

1.    Komunikazioa-komunikabideak

Identitatea eta jokamoldeen osaketan duten eragina dela-eta, bai eta 'errealitatea'ren gure ulerkera osatzeko duten gaitasunagatik ere, komunikabideek paper garrantzitsua jokatzen dute herrigintzan eta gazteon errealitatean. Hortaz, komunikabide nagusien aurrean jarrera aktibo eta kritikoa garatzea, bai eta komunikatzeko bide propioak eraikitzea ere, ezinbestekoa da herri-proiektu integrala garatu ahal izateko.

 

2.    Bizibaldintza materialak.

Azken mendean zehar sistema kapitalistak buruturiko jendarte desegituraketak mundu osora zabaldu du krisi egoera. Mendebaldean eta Euskal Herrian ere horren isla nabarmena dugu, langabeziaren igoera, etxebizitza eskubidearen lurperatzea etab. luze bat. Errealitatea gordina bada, are gehiago gazteontzat, eta bereziki gazte emakume eta pertsona migranteentzat. Gauzak horrela, gizartearen antolaketarako eta hauen beharrizanak bideratzeko bestelako ereduak aztertu ea gauzatzea litzateke erronka nagusia. Maila lokaletik hasita, ekonomia esparru alternatiboak eta solidarioak eraikitzea hain zuzen ere.

3.    Kulturartekotasuna

Euskal Herriak badu berezkoa den kultura bat zein historikoki faktore ezberdinen eskutik minorizatua izan den. Horrekin batera, migrazio prozesu ezberdinak gauzatuz joan dira hamarkadetan zehar, azkenaldian garatutakoak nabarmenagoak diren arren. Zentsu honetan kokatu beharko litzateke egun kulturartekotasunak duen garrantzia. Hau da, euskal kultura bidelagun eta euskara komunikaziorako hizkuntza bezala, kulturaniztasuna bermatuko duten guneak sortzea. Gazteetatik hasita, elkar ezagutza eta kultur transmisioa sustatzea.

4.    Hezkuntza.

Gazteon jendarteratze prozesuan hezkuntzak duen garrantzia aski ezaguna dugu. Hortik bideratzen baita, etorkizunerako pertsonen balore, pentsakera eta jarreren moldea. Egun molde honetatik kanpo, baina hezkuntza integral bat osatzeko, bermatzeko bidean dauden bestelako hezkuntza proiektuak aintzat hartzea litzateke beraz, erronka nagusienetariko bat. Bai eta hezkuntza formaletik aratago bideratzen den aisialdi elkarte-taldeen lana bermatzea.

Saioaren nondik norakoak eta ondorengo saioetan landuko diren gaiak, herrigintza gaztearen webgunean jorratuko dira.

www.herrigintzagaztea.com

Ekintzarako gaituz: Transition Hezkuntzaldian parte hartzeko lekua dago oraindik!

Gabon egunak ate joka ditugu eta guztiok gabiltza batetik bestera, urteko azken lanak amaitu, egun ero hauek antolatu, baserritar arropak armairutik atera, erosketak egin (seguruenera beharrezkoak baino gehiago) eta antzerako kontuekin bueltaka.

Baina ziur gaude mintegira gerturatzen garenok egun pasa ederra pasako dugula!! Iraunkotasunaren ikuspegitik, gure eguneroko ohiturak aztertu eta herri mailan nola jardun gaitezkeen pentsatzen arituko gara, modu dinamiko eta erakargarri batean.

Gogoratu lehen saio honetara etortzerik ez duzuenok, bigarren aukera bat izango duzuela urte hasieran.

Informazio gehiago, bagara@bagara.net edo 943796848 telefonora deituta.