Nasmastarraren apunteak

Azken boladan ez nabil bereziki emankor. Ez blogari dagokionez, behintzat. Ez dakit udazkena den, gorputza makalduta burua ere moteldu zaidan, edo norberaren zikloan kokatu beharreko nagikeria iragankorra. Tarte honetan, berriz, hemen egin ez dudana sukaldean burutu dut eta badaukat hainbat plater poltsikoan nahi duenari azaltzeko gertu.

Gaurkoa orain dela aste pare bat edo prestatu nuen, ea gidari izan nuen liburuaren laguntzaz zelan egin nuen gogoratzeko gai naizen...

Jalfrezia indiar estiloko platera da, hemen nik eskura nituen gauzetara moldatua. Gozo-gozoa eta prestatzen erraza. 20-30 min. behar dira gutxi gorabehera, eta gauza gutxi, espeziak kenduta. Hona osagaiak 4 lagunentzat:

• 500 g. oilasko papar, zati txikitan
  
• Piper gorri 1 zerrendetan moztua
  
• 125 g. baba izoztu
• Tipula 1 txikituta
• 3 berakatz-atal zanpatuta
• 2 tomate txikituta (nahi bada, lehenago zurituta)
  
• Goilarakada 1 tomate saltsa
• Goilarakadatxo 1 kurkuma hauts
• Goilarakadatxo 1/2 kumino hauts
• Goilarakadatxo 1/2 pipermin hauts
• Goilarakadatxo 1/2 garam masala (hau lortzerik ez badago, zapore bera izan ez arren, currya erabil daiteke, eta gainera ez da hain mina izango)
• Goilarakadatxo 1 ardo beltz ozpina
• Goilarakadatxo 1 ziape olioa (nik hau ez dut erabili; lasai topatzerik ez baduzu)
  
• Olioa
• Gatza
  
• Martorri ostoak (honen ordez, itxura bera duen perrexila erabildaiteke, zaporea desberdina den arren)

Berez, lehena ziape olioa berotu behar genuke, baina tira, ez badugu, nire moduan, ez da falta handia. Sartagin batean berotu daukazun olioa eta bertan tipula eta berakatza frijitu gorritu arte. Gehitu tomate saltsa, tomate txikitua, kurkuma, kuminoa, pipermina, garam masala (hau Indian eta beste herri batzuetan maiz erabiltzen den espezia nahasketa bat da) eta ozpina. Nahastu dena usaina darion arte. Erantsi piper gorria eta babak, eta eragin 2 minutuz, piperra beratu arte. Oilaskoa gehitu eta gatza bota. Su txikian sueztitu 6-8 minutuz, oilaskoa eta babak guztiz egin arte. Plateretara atera, eta gainetik martorria edo perrexila erabili apaintzeko. Eginda!

Beste gauza asko legez, arrozarekin primeran ezkontzen da, eta oso egokia da hegazti soberakinak erabiltzeko (indioilarra, eperra, ahatea...), berez oilaskoa aldez aurretik egosita egin ohi baita. Babak bezala, patata eta kalabazina ere erabil daitezke. Sukaldean oinarrizko ideia da beti hartu beharrekoa, gero norberaren gustura moldatuz. On egin!