Nasmastarraren apunteak

Azken boladan Europako iparraldetik ditugun albiste musikal gehienak Him lako taldeen eskutik datozkigu: metal doinuak, ukitu gotikoak, eta ingelesa hizkuntza bakarra. Finlandian, ordea, badaude, edo egon dira, hango hizkuntza baztertu ez duten punk taldeak. Ez dira errazak topatzen, eta agian Europa osoko punk eztandarekin batera jaio zen Appendix da adibiderik onenetakoa.

Talde hau 1.980an jaio zen, eta hasierako hiru sortzaileetatik, lehen diskorako bakarra geratu zen, Vesku Koivusalo, oker ez banago bateria-jotzailea. Harrezkero, Mikki Borgersen eta Jaska Karumo dira Veskurekin batera modu finkoan geratu ziren kideak, baita Veskuk berak taldea utzi ondoren ere.

Punk klasikoa, azkarra, amorruz betea egin dute beti, taldekideak gora behera, lehen punk belaunaldiaren izpirituari eutsiz.

Euren ibilbidean ez dute diska asko utzi, estudioko hiru baino ez, azkena aurten kaleratua. Beraz, dirudienez, Finlandia hotzean jendearen belarriak berotzen jarraitzeko prest bide ditugu.

Ez da erraza haien irudiak lortzea, baina hemen dituzue bideo bitan: bat telebistarako grabatutako zuzenekoa, eta bestea, kalitate oso badaezpadakoa baina punkaren izaera ezin hobeto jasotzen duena, Puntala-rock delako jaialdian. Non ospatzen den? Lempäälä deritzon Finlandiako herrian, irudiak 1983koak izan arren, jaialdiak bizirik baitirau gaur egun ere. Ea noiz antolatzen dugun txango bat!