Udako argazkiak

Banatu ditugu udako argazkien VII. Goiena lehiaketako sariak. Yera Sanchez aretxabaletarrak irabazi du lehen saria, Udako arratsalde bero baten argazkiarekin; argazkia Urkuluko urtegian atera zuen. Bigarren saria Maier Errasti aretxabaletarrak eskuratu du, Izan zoriontsu guztiaren gainetik argazkiari esker; Landako urtegian egindako argazkia da. Eta hirugarrena Gaizka Untzueta arrasatearrak, Ahateekin paseatzen argazkiari esker; une eta toki egokian egonda momentu bitxia atera du Vietnamen.

SARI NAGUSIA

Yera Sanchez aretxabaletarrak irabazi du sari nagusia: argazki-kamera digital bikaina, KB Photoestudio argazki-dendak eta Panasonic etxeak eskainitakoa, eta KB Photoestudiok emango dituen ikastaroetako batean %50eko deskontu bonua. Dendako Bibi Anduezak eta Jon Anduezak eman zioten saria.

2. SARIA

Aretxabaletako Maier Errastik irabazi du bigarren saria, Arrasate Bidaien eskutik Kantabrian bi lagunendako aste bukaera bateko egonaldia.
Arrasate Bidaiak agentziako Anek eta Beak eman zioten saria.

 

3. SARIA

Gaizka Untzueta arrasatearra izan da hirugarren sariduna. Gatzagako Gure Ametsa jatetxean afari eder bat irabazi du Gaizkak, atera duen momentu bitxiari esker. Argazkian, haren ama Espe saria jasotzen agertzen da Gure Ametsako jatetxeko Marisa Bolinagaren eskutik.