Etzi, zapatua, Bergarako Musika Eskolako taldeek XX. udaberri kontzertua eskainiko dute, 19:00etan Udal Pilotalekuan, Tere Aranzibiak egingo ditu aurkezle lanak. Kontzertuan eskolako talde guztiek parte hartuko dute, besteak beste: suzuki taldeak, trikitilariak, txistu taldeak, akordeoi orkestrak, abesbatzak, Gazte Bandak, orkestrak eta Aurre-hizkuntza eta hizkuntza musikaleko ikasleek. Ondoren afaria egongo da. Aurten, aldaketa txiki batekin dator hori. Urtero domekan izan ohi da kontzertua eta bazkaria egin izan ohi dute; baina aurten, zapatuan eskainiko dutenez, urteroko bazkariaren ordez afaria egingo dute.

Egitaraua

Egitarauak bere hasiera, baina,  arratsaldean izango du; hala, 18:30etan, trikitixa taldearekin kalejira izango da; ondoren, 19:00etan kontzertua, Udal Pilotalekuan, eta 21:00etan, afaria pilotalekuan. Jarraian, guztiondako jaialdia. Kontzertuko egitarauari dagokionez, Suzuki biolin taldeak 3 lan eskainiko ditu. Ondoren, akordeoi orkestrak bi lan eskainiko ditu; hirugarrenik, orkestra sinfonikoak, beste hiru lan eskainiko ditu; trikiti taldeak Vals herrikoia eskainiko du; haurren abesbatzak bi lan eskainiko ditu Eli Mendiaratz piano - jolearen laguntzarekin; txistu taldeak, lau lan eskainiko ditu, hauek artean, Ixil-ixil kanta herrikoia; Gazte Bandak, berriz, Alberto Laskurainek moldatutako marrazki bizidunei buruzko lana bat eskainiko du; eta azkenik, aurre-hizkuntza eta hizkuntza musikaleko ikasleek, Bergarako Musika Eskolako martxa eskainiko dute.