Arrasate
Dokumentu Akzioak
Arrasate
Irailaren 11n hasiko dira Birzikletarako materiala batzen
Badator beste urte batez Mugikortasun Astea Arrasatera. Oraindik denbora dezente falta arren, dagoeneko hitzordua egin dute irailaren erdialderako: 16tik 22ra, hain justu. Erakusketa, tailerra, bide hezkuntza… eta zela ez, Birzikleta azoka antolatu dituzte egun horietarako. Hain justu, Birzikleta azokarako materiala aukeratzen hasteko sasoia da, irailaren 11n hasiko dira-eta materiak hori batzen, udal azokan.
Gazteluondo eta Arrasate pasealekua lotzeko bidea egingo dute
Gazteluondo eta Arrasate pasealekua lotzeko bide berria egingo du Arrasateko Udalak. Bide hori izango da ibilgailuendako zein oinezkoendako. Eusko Jaurlaritzaren Hiriber programaren barruan (E plana modukoa) onartu dute proiektu hori finantzatzen laguntzeko 400.000 euro pasa ematea Arrasateko Udalari.
Langabeziak gora Arrasaten
INEMek emandako datuen arabera, abuztuan gora egin du langabeziak Arrasaten. Hain zuzen ere, 1.225 langabe zenbatu dituzte. Uztailean 1.192 herritar zeuden lan barik Arrasaten. Abuztuko langabezia tasa %10,59an kokatu da.
Arantzazura erromes, irailaren 12an
Arrasatetik Arantzazurako erromesaldian parte hartzeko deialdia egin dute. Ama Birjinaren egunaren osteko domekan, irailaren 12an da hitzordua. Oinez joan gura duten erromesak 06:30ean abiatuko dira Kontzezinotik; autobusez joan gura dutenak, berriz, Garibaitik aterako dira, 09:00etan. Ecuador Bidaiak agentziak daude txartelak salgai.
Udako beherapenak amaituta, udazkeneko arropak apaletan
Ofizialki atzo bazen udako beherapenen azkeneko eguna, herriko hainbat dendetan aurkitu dugu udako arropak merkeago erosteko aukerarik. Udako beherapenek izan duten harreraz galdetzera jo genuen, atzo arratsaldean Arrasateko bi dendetara; Gili-Gilin izan ginen lehenengo eta Lukon gero. Krisiak salmentetan eraginik izan duela adierazi zuten arren, bisitan joan ginen dendetan, nahiko pozik aurkitu genituen dendariak.
Datorren astean hasiko dituzte eskolak Arrasate Dragoi Gimnasia Taldekoek
Oinarrizko eskolako gimnastek (2004-2005 urteetan jaiotakoak) irailaren 7an, martitzena, izango dute lehen eskola. Arrasateko Institutuko kiroldegian, 17:00etan. Beste guztiak berriz, irailaren 8an, eguaztena, hasiko dira; Uarkapeko frontoian aurrez hitzartutako ordutegian ekingo diote denboraldiari.
Ain-1 musika taldea hunkituta itzuli da Bosniatik
Arrasateko Ain-1 musika taldean bost kide badira ere, horietako hiruk izan dute Bosniak egun bizi duen gerra-osteko egoera azalean bizitzeko aukera. Gerra amaitu zela urte batzuk badira ere, errealitate gordinaren lekuko izan dira arrasatearrak hango musika jaialdian parte hartzeko gonbidapena aitzakia hartuta. Egindako bi kontzertuekin gustura eta bihotza hunkituta itzuli dira etxera, ekimen berriei heltzeko gogoarekin. Iraitz Agirreren testigantza duzue jarraian entzungai:
Egunerokotasunera itzuliko dira gaur herriko zerbitzuak
Gaur sartu gara irailaren 1ean eta gaurko egunarekin batera hasi dira asko eta asko lanean; esaterako atzo dagoeneko denda batzuk zabaldu zituzten ateak, eta gainerako gehienek prestaketa lanak egiten ibili ostean, gaur egingo dute gauza bera. Gainera, orain arte goizez bakarrik jardun duten saltzaileek gaurtik goiz eta arratsaldez zabalduko dituzte dendak. Saltokiez gainera, bestelako zerbitzuak ere egunerokotasunera bueltatuko dira.
Fagor taldeak %35 gutxitu ditu galerak iazko lehen seihilekoarekin alderatuta
Martitzenean jakinarazi ditu Fagor taldeak 2010eko lehen seihilekoaren emaitzak, eta horien arabera, aurtengo galerak %35 gutxitu ditu iazko jardunarekin konparatuta. Are gehiago Lerro Zuria negozioak zortzi milioi eurotik gorako emaitza operatibo positiboak eskuratu dituela eman dute aditzera, eta Fagorri dagokion Ebitda adierazle finantzaria %10 hazi dela (enpresaren errentagarritasun operatiboa neurtzen duen adierazlea).
Kontsumitzeko txartelak opari, Ibai Arte elkartearen eskutik
Abuztuko geldialdiaren ostean, badator Ibai Arte elkartea bezeroendako opari berriekin. Oraingo honetan, kontsumitzeko txartelak zozketatuko dituzte, hiru eurokoak eta elkarteko ostalaritza establezimenduetan erabiltzeko. 500 halako zozketatuko dituzte irailaren 30era bitartean.
