Ikurrinari omenaldia egin diote gaur arratsaldez Aretxabaletako Herriko Plazan. Ana Bolinaga alkatea buru, udal ordezkaritza zabala izan da bertan. Herriko Plazan dagoen mastan ikurrina berria jarri dute, eta dantzari talde batek agur dantza eskaini diote jarraian. Omenaldi aurretik alkateak, Gobernu Ordezkaritzak Aretxabaletako Udalari Espainiako bandera jartzeko eman dion agindua salatu du.
Joan den eguenean hasi zituen Udalak ikurrinaren aldeko ekitaldiak. Hogei zinegotzitik gora elkartu ziren orduan, Espainiako banderaren "inposaketa" salatu eta "geurea" ikurrina dela aldarrikatzeko. Izan ere, astelehenerako jarri beharko dute Espainiako bandera zintzilik udaletxeko balkoian eta horren aurretik ikurrina omendu gura izan dute Udal ordezkariek.
Omenaldia hasi aurretik espainiar bandera jartzeko agindua salatzen duen plaka jarri dute udaletxeko atean.