Aramaio Albisteak
Eguzkierripa auzoa rock gogorraren topaleku izango da zapatuan
2012-05-21 08:30:00 Jokin Bereziartua
Aramaioko Gazte Asanbladaren ekimenez, Eguzkierripa Rock jaialdiaren laugarren edizioa ospatuko dute zapatuan, hilak 26. Asanbladako kideek gogoratu dute nola sortu zen jaialdia: "Jaialdiaren ideia lagun arteko berbaldi batetik sortu zen. Herrian ezaguna den leku eder baten, hau da, Andra Mari ermitan, zerbait egin zitekeela pentsatu genuen. Aterpe ederra dugu eta ermita bat izateak beste xarma bat ematen dio". Honakoa ere gaineratu dute: "Jaialdia herrian errotuta dago eta asanbladarendako oso hitzordu garrantzitsua da".
San Martin eskola margotzen, guraso elkartearen ekimenez
2012-05-17 11:53:09 Jokin Bereziartua
Pasa den aste bukaeran Aramaioko guraso elkarteak antolatuta, guraso eta irakasle talde bat San Martin eskola margotzen ibili ziren. Gabonetan ateak eta armarioak egin ziren eta joan den zapatuan bigarren solairuko sabaiak margotzen aritu ziren. Hurrengo saioan lehengo solairuko sabaia eta hormak margotuko dituzte. Adierazi digutenez, "umore onean" ibili ziren eskolaren barrualdea txukuntzen eta hurrengorako falta ziren gurasoei parte hartzeko deia luzatu gura diete.
Latxa Esnea Kooperatiba jaio da
2012-05-16 11:00:55 Goiatz Arana
Euskal Herriko hogeita hamar bat artzainek, Maider Unda borrokalari aramaioarrak tartean, indarrak batu dituzte ardi latxarekin lan egiten duen artzainen lehen kooperatiba sortzeko. "Ardi latxa duten ustiategien zerbitzura dagoen lantresna" da eta esnea elkarrekin saltzea du helburu, ekoizle eta gaztandegien arteko oreka lortuz.
Aramaioko Udalak epaitegietara joko du
2012-05-15 17:51:19 Goiatz Arana
Aramaioko Udalak epaitegietara joko du AHTren lanen ondorioz Arrasaterako errepidea moztu izanak eragin zituen gastuak erreklamatzeko. Urtebete inguru eman behar izan zuten Arrasatera heltzeko auzoz auzo igarotzen, eta bide berria zabaldu zutenetik beste urtebete baino gehiago pasa bada ere, ez dute oraindik orduko hura ahaztu. Kalte-ordainak eskatu zituzten arren, ez dute sosik ere kobratu.
Udalsarea 21 euskal udalerrien sarean sartu da Aramaioko Udala
2012-05-14 11:01:11 Jokin Bereziartua
Sareko kide izanik, Udalsarea 21eko kide diren udalerriekin batera jasangarritasunaren alde lan egin eta elkarrekin sinergiak garatzeko aukera izango du Aramaiok. Era berean, Udalsarea 21en laguntza teknikoa eta ekonomikoa izango ditu Tokiko Agenda 21ari dagozkion hainbat proiektu bultzatzeko eta garatzeko.
"Goazen plazara, denon artean lortuko dugu-eta aulki huts guztiak betetzea"
2012-05-14 10:28:01 Jokin Bereziartua
"Aramaioarrei parte hartzeko deialdia luzatzen diegu, denon ekarpenen bidez eramango dugu-eta aurrera Herrira ekimena, eta denon artean lortuko dugu Euskal Herriko aulki huts guztiak betetzea". Aramaioko 'Herrira'-ko arduradunen hitzak dira, Euskal Herri osoan zapaturako deitutako 'Goazen plazara!' ekimenaren harira. Zapatu goizerako lau ekintza antolatu dituzte; plazan, noski: korrika, bizikletan edo patinetan egiteko krosa, jolasak eta eskulanak, dantzari eta trikitalariez girotutako poteoa eta amaitzeko, konzentrazioa.
Haur sahararrekin 'Oporrak Bakean' igarotzeko deia egin du Udalak
2012-05-10 12:27:29 Jokin Bereziartua
Euskadiko Fronte Polisarioaren ordezkaritzaren idatzia jaso du Aramaioko Udalak, 2012ko "Oporrak Bakean" programaren gainean. Aurten 410 saharar haur ekarri gura dituzte EAEra –7 eta 12 urte arteko haurrak–, 2012ko ekainaren 30etik 2012ko abuztuaren 30era bitartean oporrak gurean pasa ditzaten. Eusko Jaurlaritzako Osasun Sailak haurren osasun laguntza bere kargu hartuko du EAEn dauden bitartean eta erantzukizun zibilari eta istripuei aurre egiteko aseguru pribatua izango dute. Era bereab, Aramaioko Udalak bere gain hartuko ditu haurraren bidaiaren gastuak. Haur horiei laguntzeko haur bat ekartzea edo programaren inguruan informazio gehiago jasotzea gura duenak jo dezala Udal buelgoetara.
Maider Unda: "Londresen espero dut domina lortzea"
2012-05-10 11:46:49 Irati Goitia
Maider Unda borrokalariak Joko Olinpiarretarako txartela eskuratu du Helsinkin, Finlandian. Azken hiru asteak lehiatzen egin ditu eta domeka honetan, azken aukeran, sailkatu da Londreserako.
Aramaioko Udalak Plan Orokorra euskaraz tramitatu dezan eskatu dio Arabako Diputazioari
2012-05-08 16:34:59 Jokin Bereziartua
Aramaioko Udalak Plan Orokorra euskaraz tramitatu dezan eskatu dio Arabako Aldudiari. Izan ere, Diputazioak Plan Orokorraren dokumentazioa euskaraz bidaltzea "akatsa" dela aipatu eta zuzentzeko jakinarazpena bidali dio Udalari. Udalak "harridura eta adostasunik eza" erakutsi nahi du jakinarazpen horren aurrean. Horretarako prentsaurrekoa egin dute gaur Gasteizen Ramon Ajuria Aramaioko alkateak eta Lierni Altuna Bilduko bozeramaileak.
Mahaiaren bueltan jokoan, giro ederrean ibili ziren Alaiak erretiratu elkartekoak
2012-05-08 15:06:50 Jokin Bereziartua
San Prudentzio ospatzeko, asteburuan mahai jokoen txapelketak jokatu zituzten Alaiak erretiratu elkartekoek. Hilaren 3an, Briska txapelketak jokatu ziren eta emakumeek bakarrik hartu zuten parte. Zapatuan, berriz, gizonezkoen txanda izan zen; egun horretan jokatu ziren mus eta tute txapelketak. Sariei dagokienez, bikote irabazleek gazta bat irabazi zuten, bigarren bikoteek txanpan botila bana eta hirugarren bikoteek, azkenik, ardo botila bana.
goiena.net © Goiena Komunikazio Taldea
Otalora Lizentziaduna 31 · 20500 Arrasate (Gipuzkoa)
Tel.: 943 25 05 05 · webmaster@goiena.com
