Omar Fraile Antzuolako sarian azkarrena

Hamabost kilometro. Berez, bizikleta gainean erraz egiten den distantzia da. Baina, hamabost kilometro horiek egiteko hamabost segundoko abantaila baino ez duenarendako lasterketa oso bat da, ibilbidea berriro hasiko balu bezala, bakarrik, gainera.

Horixe gertatu zaio Omar Fraileri (Seguros Bilbao) goizean egin duten Antzuola sarian. Elgetatik Antzuolara arteko tartea bakarrik egin du, eta eutsi egin dio hamabost segundoko abantailari.

Arantzetak ez du amaitu

Antzuolako onenaren saria prest zuten antolatzaileek, baina ibarreko ordezkari bakarrak ezin izan du saria jaso, Deskargan bertan behera utzi duelako proba: "Banekien ez nengoela lasterketa amaitzeko moduan. Orain amaitu ditut azterketak, eta astebete entrenatuta ezin dira mirariak egin. Ibili naiz bizikletan, baina ikasketak direla-eta erregulartasun barik, eta hori igarri egiten da. Baina, gazte mailatik amateur mailarako saltoa ez zait horren gogorra egin. Antzuolatik pasa behar ginen alditan ahalik eta txukunen pasatzea zen nire asmoa", adierazi zigun helmugan Xabier Arantzetak. Kronika osoa, Asteleheneko Goienkaria-n.

Sailkapena:

1. Omar Fraile (Seguros B.)    2:55:16
2. Ramon Domene (Seg.)     15 seg.
3. Aritz Orbe (Bidelan)    18ra
4. Pello Bilbao (Naturgas)    18ra
5. Jesus Ezkerra (El Soplao)    18ra
6. Ibai Salas (Seguros Bil.)    18ra
7. Jordi Simon (Caja Rural)    18ra
8. Joseba Elortza (Bidelan)    18ra
9. Antonio Pedrero (Seguros)    21era
10. Igor Merino (Naturgas)    27ra