Erakusleiho onenak: Buart, Traskilon eta Altuna, hurrenez hurren

2011-12-21 19:29:01 Asier Alkorta

Gaur, 18:15ean, eman dituzte erakusleiho onenen sariak eta denen artean onena Buart loradendarena izan dela erabaki du epaimahaiak. Bigarren saria Traskilon txakurren ile apaindegiak eskuratu du eta hirugarrena, Ibaiarte dendarien elkarteak ematen duena, Altuna lurrindendak jaso du.

Guztientzat sorpresa izan da. Inork ez zuen espero. Izan ere, Udal ordezkariak dendarik denda joan dira sariak ematen, saridunek ezer jakin barik. "Hau sorpresa; hau poza!", horixe zen hiru sarituek behin eta berriz errepikatzen zutena.

Besteak beste, Inazio Azkarraga alkatea, Joserra Askasibar eta Kepa Urteaga izan dira sariak banatzen ibili diren Udal ordezkariak. Ibaiartek ematen duen hirugarren saria, Altuna lurrindendak jaso duena, Garbiñe Saez de Gordoa Ibaiarteko ordezkariak eman du.

Lehiaketa honekin, Udalak eta Ibaiartek dendariek egindako esfortzua saritu nahi izan dute. "Gainera ez dute bakarrik urtean behin egiten. Beti ibiltzen dira erakusleihoak ondo-ondo apaintzen", esan dute Udal ordezkariek.

Erantzunak

Egin login erantzunak uzteko

Traskilon txakurren ile apaindegiko arduraduna, Udal ordezkariekin, bigarren saria jasotzen. Argazkia handitu