Copreciko aparkalekuan eraikina egitea aurrera

Eusko Alkartasunaren ustez, "epe motzerako neurri erreaktiboa" da Copreciren eta Udal Gobernuaren artean adostutakoa. Eta alde bozkatu izana azaldu gura dute: "Onartu egin dugu, betiere Copreci enpresaren garapenaren mesedetan. Hala ere, dagokion ingurumen inpaktuaren azterlana egin beharko du eta zaratak eta gas isurpenak zaindu. Horien mugak zehaztuta utzi beharko dira".

Ezker Batua-Berdeak alderdiko Tomas Fernandezek, ostera, ezetz bozkatu zuen. Haren esanetan, lehentasuna Copreci Aretxabaletan geratzea da, baina beste aukera batzuk ez direla behar beste aztertu uste du: "Industriak herri barrutik ateratzen dabiltza, eta guk beste eraikin bat egiten utziko dugu; ez da naturala hori". Eta Aretxabaletak baduela industriarako lurra dio: "Zubikoa, esaterako. Bertara eroatea garestia dela? Coprecik gastuaren erdia har zezakeela uste dut –orain egin beharko duen gastua– eta bestea finantzatzeko SPRIrekin bilera gehiago egin behar zituzten. Jaurlaritzak ere zati bat jar zezakeen eta Udalak beste bat", dio; eta gaineratu du: "Inguruko bizilagunekin haserre bukatzeko izango da".